Лінкі ўнівэрсальнага доступу

Кіраўнік беларускага мабільнага апэратара life:) не выключае, што Беларусь можа стаць першай краінай, дзе будзе запушчаная мабільная сувязь чацьвёртага пакаленьня.


Выступаючы сёньня на прэс-канфэрэнцыі Азджан Эрміш, генэральны дырэктар ЗАТ "БеСТ", якому належыць гандлёвая марка life:), сказаў, што ужо праз 3-4 гады ў розных краінах сьвету пачнецца ўкараненьне мабільнай сувязі чацьвёртага пакаленьня. "Наша інфраструктура адаптавана да 4G-тэхналогіяў, таму для пераходу на новую плятформу досыць будзе зрабіць абнаўленьне сыстэмы без неабходнасьці ўсталёўваць дадатковае абсталяваньне. І тады Беларусь можа стаць першай у сьвеце краінай, якая ўкараніла мабільную сувязь 4G", – цытуе словы Эрміша агенцтва БЕЛТА.

Па словах кіраўніка life:), зараз ідзе актыўнае падключэньне беларускіх абанэнтаў да паслугі хуткаснага мабільнага доступу ў Інтэрнэт. Да канца гэтага году мабільны апэратар плянуе падключыць 50 тыс. карыстальнікаў. "Цікавасьць беларусаў да 3G апынулася на 25-30% вышэй, чым чакалася", – сказаў Азджан Эрміш.

На сёньня ў сьвеце існуе дзьве асноўныя тэхналёгіі сувязі чацьвёртага пакаленьня: HSPA+ і LTE. У адрозьненьне ад LTE, дзе патрабуюцца сур'ёзныя зьмены як на ўзроўні радыёдоступу, так і ў сетцы камутацыі, тэхналёгія HSPA+ забясьпечвае зваротную сумяшчальнасьць з тэрміналамі (тэлефонамі і мадэмамі 3G). Таму ня дзіўна, што life:), які ўжо прапануе паслугі ў стандарце 3G, цалкам гатовы да апгрэйду свайго абсталяваньня да наступнага пакаленьня. Для таго, каб перайсьці да 4G фактычна спатрэбіцца толькі рашэньне адпаведных дзяржаўны органаў па выдзяленьні неабходных для гэтага частот.

Паказаць камэнтары

XS
SM
MD
LG