Лінкі ўнівэрсальнага доступу

logo-print

Севярын Квяткоўскі


Севярын Квяткоўскі, abrykos.livejournal.com/profile
Нарадзіўся 30 сакавіка 1973 году. Творчую дзейнасьць як літаратар пачаў у газэце “Наша Ніва” ў 1992 годзе. Як журналіст дэбютаваў на “Radio 101,2 FM” у 1995, потым працаваў у газэце “Имя”, у беларускай рэдакцыі “Польскага радыё”, “Радыё Рацыя”, “Радыё Свабода”, ад 2008 — кіраўнік грамадзкага блогу budzma.org

1. Навошта я пішу блог


Для мяне блог — мой асабісты міні-СМІ. У мяне ёсьць публіцыстыка, навіны, камэнтары, рэпартажы, абвесткі, дайджэст цікавых мне інфармацый. Гэта мая прыватная інфармацыйная тэрыторыя. Мой блог/дзёньнік амаль ня мае падзамочных (бачных вузкаму колу людзей) запісаў — я пішу для чытачоў.

2. Што я больш за ўсё люблю ў блогах

Аўтарская грамадзкая журналістыка, дзе факт падаецца з аўтарскай пазыцыі таго, хто публікуе. Люблю апэратыўнасьць рэфлексіі блогераў, люблю назіраць як грамада выбірае самае важнае на сёньня.

3. Што я больш за ўсё не люблю ў блогах

Фрэнд-стужка — гэта вінігрэт, дзе пра якую-кольвек гармонію, ладную канцэпцыю, фармат ня можа быць гаворкі. Фрэнд-стужка на 100% непрадказальная. Ты можаш з добрым настроем пачаць чытаць і не заўважыць, як ужо гадзіну ваюеш з кімсьці, адстойваючы сваю пазыцыю. Зрэшты, з часам вучысься правілам навігацыі ў блогасфэры :)

4. Пяць блогаў, якія я раю наведаць

a-tatarintsev.livejournal.com — бізнэсмэн Аляксандар Татарынцаў, сядзіць у турме (былы галава Джэм-банку). Ня ведаю, як ён посьціць свае допісы — праз інтэрнэт з камэры ці перадае праз адваката. Татарынцаў разважае на дзьве тэмы: беларуская эканоміка і чалавек за кратамі — захапляльна і павучальна.

poczobut.livejournal.com — гарадзенскі журналіст і гісторык Андрэй Пачобут змагаецца з савецкімі дэманамі часоў Сталіна і сёньняшнімі. Прынцыпова, бескампрамісна выкрывае НКВД, КГБ і КДБ ды спадарожныя ім ўтварэньні, агулам і па пэрсаналіях.

bacharevic.livejournal.com — Празаік Альгерд Бахарэвіч публікуе ў сваім дзёньніку не мастацкую літаратуру, а цудоўную эсэістыку і публіцыстыку. Для ўсіх, каго цікавіць сучасная літаратура.

kilgor-trautt.livejournal.com — блог Мікалая Халезіна, стваральніка і кіраўніка менскага "Свабоднага тэатру". Апроч навінаў (посьпехаў) тэатру, Мікалай дзеліцца ўражаньнямі ад падарожжаў і ад падзеяў у Беларусі. Шчыра, кропкавымі ўдарамі раскрывае той ці іншы востры сабж.

vadim-i-z.livejournal.com — выкладчык адной з дакладных навук у менскім ВНУ. Вялікі аматар Меснку: гісторыі сучаснасьці гораду. Вялікі энтузіяст папулярызацыі ведаў пра Меснк. Калі чытаеш ягоны блог, складаецца ўражаньне, што Вадзім ведае горад ледзь не да кожнай цаглінкі, але кожны раз адкрываеш штосьці новае ў ягоным блогу.
XS
SM
MD
LG