Заява Фішара азначае, што амэрыканцы таксама ня будуць ставіць у Польшчы другую частку сыстэмы, у якую, паводле ранейшых плянаў, уваходзіць база амэрыканскіх ракет-перахопнікаў.
Дамовы паміж ЗША ды Польшчай і Чэхіяй аб пабудове гэтай сыстэмы былі падпісаныя летась, яшчэ за адміністрацыі папярэдніка Абамы, Джорджа Буша.
Афіцыйна Вашынгтон апраўдваў пабудову сыстэмы пагрозай ракетнай атакі супраць сваёй тэрыторыі або Эўропы з боку такіх недружалюбных дзяржаваў, як Іран. Падобная сыстэма абароны – супроць магчымай ракетнай атакі з Паўночнай Карэі – была пабудаваная амэрыканцамі ў Каліфорніі і на Алясцы.
Паводле плянаў адміністрацыі Буша, радар меўся быць пастаўлены на вайсковым палігоне Брды, за 90 кілямэтраў на паўднёвы захад ад Прагі. Амэрыканскія ракеты-перахопнікі павінны былі стаяць на тэрыторыі былога вайсковага лётнішча ў Радзікове, што знаходзіцца за 20 кілямэтраў ад Балтыйска мора, больш-менш пасярэдзіне польскага ўзьбярэжжа.
Супраць пабудовы гэтай сыстэмы з самага пачатку рашуча пратэставала Расея, даючы зразумець, што сыстэма скіраваная ў першую чаргу супраць яе, а не супраць Ірану, які ня мае такіх ракетаў, якія змаглі б даляцець да Заходняй Эўропы, ня кажучы пра Амэрыку.
І гэтак, паводле сёньняшняга выданьня газэты „Wall Street Journal”, выглядае афіцыйнае амэрыканскае тлумачэньне, чаму Вашынгтон адмаўляецца ад пабудовы супрацьракетнага шчыта ў Чэхіі і Польшчы.
Аднак назіральнікі разглядаюць адмаўленьне Вашынгтону ад пабудовы сыстэмы супрацьракетнай абароны ў Эўропе перш за ўсё як амэрыканскую саступку Расеі і спробу заручыцца падтрымкай Крамля ў вайне амэрыканцаў у Аўганістане ды ў іхніх памкненьнях утаймаваць ядзерныя амбіцыі Ірану.
