Лінкі ўнівэрсальнага доступу

Вёска Палачанка Валожынскага раёну


Дзіцячы аздараўленчы лягер “Палачанка”, вёска Палачанка Валожынскага раёну

Дзіцячы аздараўленчы лягер “Палачанка”, вёска Палачанка Валожынскага раёну



Шыльда Свабоды

Дзіцячы аздараўленчы лягер “Палачанка”, вёска Палачанка Валожынскага раёну
Тут у сьнежні 1987 году адбыўся Першы вальны сойм беларускіх суполак, на якім акрэсьлілася радыкалізацыя моладзевага руху. Быў вызначаны курс на нацыянальна-культурнае і дэмакратычнае адраджэньне Беларусі.

У другой палове 1980-х гадоў па ўсёй Беларусі ўзьніклі сотні нефармальных моладзевых суполак, зацікаўленых у адраджэньні нацыянальнай культуры.

26—27 сьнежня 1987 году ў санаторыі “Палачанка”, што пад Ракавам, адбыўся Першы вальны сойм беларускіх суполак. Афіцыйна ён называўся “Рэспубліканскай нарадай моладзевых аб’яднаньняў гістарычна-культурніцкага і краязнаўчага кірунку”. Удзельнічалі ў ім некалькі соцень чалавек з усёй Беларусі.

Паэт Алесь Аркуш прадстаўляў полацкае літаратурнае аб’яднаньне “Крыніцы”:

“Было такое ўражаньне, што сапраўды працэс мусіць рухацца наперад, што немагчыма яго прытармазіць. І ўсё ж моладзі, якая прыехала, трэба было мець нейкую сьмеласьць. Гэтая моладзь ужо была структурызаваная ў нацыянальныя моладзевыя асяродкі. У прынцыпе, мы ўсе так ці інакш адзін аднаго ведалі — ці то зьбіраліся на Купальлі, ці то разам выходзілі на мітынгі. Так, у нас у Наваполацку ўвесь час адбываліся экалягічныя мітынгі, якія мы арганізоўвалі, і да нас прыяжджалі госьці з розных моладзевых арганізацыяў. Гэта ўсё было адно кола, і цяпер ужо, сабраўшыся разам, мы абмяркоўвалі, як павінна паўставаць краіна, што яна павінна быць незалежнай, нацыянальна-арыентаванай”.

Акрамя дыскусіяў пра незалежнасьць, дзяржаўнасьць беларускай мовы, дэмакратыю — паэты чыталі вершы, барды і рок-музыкі сьпявалі.

Празь некалькі месяцаў па выніках дыскусіяў склалі і распаўсюдзілі ў самвыдаце “Адозву ініцыятыўнай групы Канфэдэрацыі Беларускіх моладзевых суполак”. У дакумэнце адкрыта заяўлялася, што толькі “фактычная сувэрэннасьць Беларусі… дазволіць ажыцьцяўляць найбольш адпаведныя характару рэспублікі палітычныя, эканамічныя і культурныя праграмы не па цэнтралісцкіх мадэлях”. У адозьве гучаў заклік да моладзевых суполак працаваць дзеля незалежнасьці, дэмакратызацыі Беларусі, разьвіцьця нацыянальнай культуры. Натуральна, што далей нацыянальным суполкам было не па дарозе з камсамолам.

У студзені 1989 году на Другім вальным сойме ў Вільні была ўтворана Канфэдэрацыя беларускіх суполак — як палітычны саюз дзеля барацьбы за незалежнасьць краіны і супраць праяваў сталінізму.
  • 16x9 Image

    Вячаслаў Ракіцкі

    Вячаслаў Ракіцкі – беларускі журналіст, тэатральны і кінакрытык, рэжысэр і сцэнарыст дакумэнтальнага кіно, перакладчык. Кандыдат мастацтвазнаўства. Сябра Саюзу беларускіх пісьменьнікаў і Беларускай асацыяцыі журналістаў. Аўтар Радыё Свабода з 1997 году.

Паказаць камэнтары

XS
SM
MD
LG