Лінкі ўнівэрсальнага доступу

Зьезд БНФ. Гарадок: “Абрыдлі спрэчкі!”


Леанід Аўтухоў

Леанід Аўтухоў

Леанід Аўтухоў апошнія некалькі год ачольвае суполку Партыі БНФ у райцэнтры Гарадок Віцебскай вобласьці. Ён абраны дэлегатам будучага зьезду і лічыць, што галоўным яго вынікам павінна стацца абраньне асобы, якая магла б ня толькі ўзяць удзел у наступных прэзыдэнцкіх выбарах, але і перамагчы на іх:

“Гэтага зьезду я чакаў амаль год. Цягам году я чакаў, ці знойдзе Партыя БНФ у сваіх шэрагах годнага кандыдата на прэзыдэнцкую пасаду — на бліжэйшыя выбары. І я лічу, што гэтае пытаньне павінна разглядацца першым! Калі абяром кандыдата, выслухаем ягоную прапанову наконт старшыні Партыі БНФ. Таму што старшыня партыі, мажліва, будзе кіраўніком выбарчага штабу.

Кандыдат, я лічу, ёсьць — гэта Лявон Баршчэўскі. А наконт старшыні — пытаньні. Ёсьць сёньня два галоўныя прэтэндэнты, Янукевіч і Івашкевіч. Але гэта ўжо пытаньне тэхнічнае. Бо першае і галоўнае — гэта абраць кандыдата на прэзыдэнцкую пасаду і Сойм, які будзе працаваць, а не спрачацца паміж сабой. Абрыдлі гэтыя спрэчкі! Патрэбны Сойм, які будзе працаваць на карысьць партыі.

Я так мяркую і чакаю ад зьезду, што ён пройдзе на карысьць аб’яднаньня партыі, а ня дзеля расколу, як нехта, можа, чакае. Веру, што пасьля зьезду партыя стане мацнейшай, і тады ёсьць шанец правесьці прэзыдэнцкую выбарчую кампанію ня дзеля ўдзелу, а для таго, каб перамагчы. Партыі БНФ трэба зрабіць для гэтага некалькі крокаў, і першы зь іх — гэта годна правесьці зьезд 5 верасьня 2009 году”.

Паказаць камэнтары

XS
SM
MD
LG