Лінкі ўнівэрсальнага доступу

Ф.Вячорка: У войску ўсё трымаецца на страху


Франак Вячорка і Зьміцер Хведарук за апошнія два месяцы атрымалі звальненьне. Зьмітра днямі вазілі ў вайсковую паліклініку. Ад 7 верасьня яго зноў пакладуць на абсьледаваньне.


Франак Вячорка
Франак Вячорка два месяцы ня мог выйсьці за межы вайсковай часткі. Як толькі ён атрымаў звальненьне, то змог сказаць некалькі словаў “Свабодзе” пра сваю службу.

“Дзякуючы грамадзкім арганізацыям, а таксама сродкам масавай інфармацыі, якія паднялі шум вакол майго пакараньня і забароны карыстацца беларускай мовай, пытаньне вырашылася. Справай занялася вайсковая пракуратура, прыяжджалі падпалкоўнікі таксама з галоўнай камэндатуры, яны, відаць, увалілі нашаму начальству, і тады пытаньне вырашылася”.

Прадстаўнік пракуратуры тады нават паведаміў Франку, што будзе хадайнічаць, каб зрабілі пераклад статуту, камандаў і вайсковых тэрмінаў на беларускую мову.

Франак Вячорка апавёў, што цяпер ён атрымлівае газэты.

“Газэты я атрымліваю, але з такой умовай, каб іх ніхто не чытаў. То бок, я павінен, як атрымаў газэту, у той жа дзень яе прачытаць і ў той жа дзень яе зьнішчыць. Яе нельга захоўваць у пакоі для адпачынку, нельга захоўваць у тумбачцы.

Натуральна, салдаты-кантрактнікі просяць пачытаць. Шмат хто зь іх цікавіцца падзеямі, якія адбываюцца ў краіне. Ну, калі просяць, то я даю”.
служба ў войску — цікавы досьвед, але ён ня варты паўтара года жыцьця. ...

Франак лічыць, што служба ў войску — цікавы досьвед, але ён ня варты паўтара года жыцьця.

“Мне гэтых паўгода дастаткова, каб уявіць, як працуе вайсковая сыстэма. А працуе яна менавіта на страху, на страху пакараньня і на татальным кантролі. У войску няма 5 хвілінаў на дзень, каб ты не пабыў без нагляду, ці то гэта будзе сяржант, кантрактнік, ці афіцэр.

За табой назіраюць і калі ты сьпіш, і калі выходзіш на вуліцу. Не застаецца часу на асабістае. Войска менавіта й змагаецца з праявамі гэтага асабістага. Ты чалавек залежны, і твая задача — ня думаць, а выконваць рашэньні”.

Зьміцер Хведарук
Зьмітра Хведарука 26 жніўня прывозілі ў паліклініку на кансультацыю да оталярынголяга. Зьміцер гвалтоўна трапіў у войска разам з Франкам Вячоркам і Іванам Шылам. Большую частку службы ён правёў у шпіталях.

Зьміцер адказаў наконт стану здароўя:

“Пытаньне са здароўем ёсьць. Гэта цяпер у асноўным з-за нагрузак, бо ў кастрычніку тут чакаюць праверку. Будуць задаваць кантрольныя пытаньні, таму даволі шмат займаюся фізычнай падрыхтоўкай, дый шмат рознай іншай працы”.

Ад 7 верасьня Зьміцер Хведарук будзе знаходзіцца ў вайсковым шпіталі. Ён спадзяецца, што там пабачыцца са сваімі сябрамі.

Паказаць камэнтары

XS
SM
MD
LG