У царкве “Новае жыцьцё” кругласутачна дзяжураць вернікі, вядзецца бесьперапыннае маленьне. Пакуль некалькі дзесяткаў чалавек, мяняючы адзін аднаго, моляцца за тое, каб вырашыўся канфлікт царквы са сталічнымі ўладамі, тыя робяць свае захады адносна лёсу будынка. Юрыст царквы Сяргей Луканін паведаміў пра апошні ліст з фонду “Менгармаёмасьць”, які належыць да структур Менскага гарвыканкаму:
У фондзе “Менгармаёмасьць” спаслаліся на закон, паводле якога ўласнасьць могуць перадаць прымусова, калі добраахвотна не выконваецца судовае рашэньне аб перадачы будынка царквы Менгарвыканкаму. Далейшыя крокі чыноўнікаў адносна царквы ў фондзе камэнтаваць адмовіліся.
Сяргей Луканін кажа, што рашэньне аб перадачы права на ўласнасьць азначае тое, што вернікі з уладальнікаў будынка ператварыліся ў яго захопнікаў і цяпер можна чакаць любых дзеяньняў улады. “Вернікі вырашылі не аддаваць царкву”, - заявіў Сяргей Луканін. Журналістаў цяпер у залю, дзе адбываецца маленьне, не пускаюць.
Тым часам пастары больш як 50 пратэстанцкіх цэркваў Беларусі напісалі адкрыты ліст да Аляксандра Лукашэнкі ў абарону царквы “Новае жыцьцё”. Пра сытуацыю з царквой ведае ўсё болей людзей у Беларусі і ў сьвеце. Учора ў Варшаве вернікі царквы “Новае жыцьцё” распавялі пра сваю барацьбу польскім журналістам і журналістам спадарожнікавага каналу “Белсат”, што вяшчае на Беларусь.
У суботу, 29 жніўня ў царкве “Новае жыцьцё” зноў чакаюць прыезду больш як тысячы вернікаў, якія правядуць чарговы малельны маратон, паведаміў Сяргей Луканін.
