Лінкі ўнівэрсальнага доступу

Гордан у Менску адмовіўся ад сустрэчы з прэсай


Філіп Гордан

Філіп Гордан

Сустрэчай у 8.45 з лідэрамі грамадзянскай супольнасьці пачаўся сёньня раніцай візыт у Менск памочніка Дзяржсакратара ЗША Філіпа Гордана.


Гордан апазыцыі: санкцыі адменяць толькі пасьля грунтоўных зьменаў


У Філіпа Гордана заплянаваныя перамовы ў Адміністрацыі прэзыдэнта і Міністэрстве замежных справаў, а таксама з прадстаўнікамі грамадзянскай супольнасьці.

"Плянуецца абмеркаваць увесь комплекс пытаньняў беларуска-амэрыканскіх дачыненьняў", — паведаміла напярэдадні прэсавая служба МЗС Беларусі.

Паводле спадара Гордана, галоўнымі крытэрамі для ЗША застаюцца правы чалавека і дэмакратыя. Беларусь павінна вызваліць усіх палітвязьняў, даць больш свабоды няўрадавым арганізацыям і мэдыям, а таксама правесьці свабодныя і празрыстыя выбары.

Гордан падкрэсьліў, што “ёсьць спосабы, каб дамагчыся зьменаў”. Ён таксама адзначыў, што санкцыі ЗША адносна Беларусі — гэта вынік парушэньня правоў чалавека. І яны будуць адменены толькі ў тым выпадку, калі краіна будзе імкнуцца да дэмакратыі.

Філіп Гордан
У траўні 2009 году Сэнат зацьвердзіў Філіпа Гордана на пасадзе памочніка дзяржсакратара ў справах Эўропы і Эўразіі. З 2000 па 2009 год Філіп працаваў старшым дасьледчыкам у дасьледным цэнтры Брукінгз. Да гэтага быў кіраўніком дэпартамэнту эўрапейскіх справаў ў Радзе бясьпекі ў адміністрацыі прэзыдэнта Біла Клінтана. Раней Філіп Гордан працаваў у дасьледных цэнтрах – Міжнародны інстытут стратэгічных дасьледваньняў (Велікабрытанія), Унівэрсытэт Джона Гопкінса (ЗША), Інстытут бізнэс-адміністраваньня (Францыя –Сінгапур), Нямецкае таварыства зьнешняй палітыкі. Гаворыць на францускай, нямецкай, італьянскай мовах. Аўтар шэрагу кніг і артыкулаў па пытаньнях міжнародных адносінаў і зьнешняй палітыкі, публікаваўся ў New York Times, Washington Post, International Herald Tribune і Financial Times.

12 чэрвеня Прэзыдэнт ЗША Барак Абама на год прадоўжыў дзеяньне указа пра арышт уласнасьці “шэрагу асобаў, якія падрываюць дэмакратычныя працэсы ў Беларусі”, што знаходзіцца на тэрыторыі або пад юрысдыкцыяй ЗША.

Дачыненьні з ЗША былі сапсаваныя яшчэ ў сярэдзіне 90-х гадоў. А ўвядзеньне санкцый супраць канцэрну “Белнафтахім” на пачатку 2008 году прывяло да дыпляматычнага канфлікту. Амбасадарка ЗША Карэн Ст’юарт вымушана была пакінуць Беларусь, а склад амбасады значна зьменшыўся. Амэрыканскі бок увёў санкцыі, патрабуючы вызваленьня палітвязьняў. Пасьля таго як апошні палітвязень зь міжнародна прызнанага сьпісу выйшаў на волю, ЗША прыпынілі санкцыі супраць двух беларускіх прадпрыемстваў.
XS
SM
MD
LG