Лінкі ўнівэрсальнага доступу

Чаму Шушкевіч за месяц начаваў дома толькі шэсьць разоў?


Як праводзяць летні адпачынак вядомыя ў Беларусі людзі? Станіслаў Шушкевіч сумяшчае адпачынак з працай. Анатоль Лябедзька плянуе адпачыць зімой. Мікалай Чаргінец марыць прадаць лецішча.

Былы старшыня Вярхоўнага Савету Станіслаў Шушкевіч сумяшчае адпачынак з працай. За апошнія 35 дзён ён начаваў дома толькі шэсьць разоў. Астатнія дні правёў у Паўднёвай Карэі, Нямеччыне, Польшчы, Літве і Ўкраіне.

“Я выкарыстоўваю гэты час, каб нешта зарабіць ва ўнівэрсытэтах, бо тут жа начальнік дзяржавы пазбавіў мяне пэнсіі. Таму я шмат ежджу, гляджу на сьвет і зарабляю сабе грошы на жыцьцё. У мяне пэнсія, згодна з указам Лукашэнкі, як шчыгрынавая скура. Ён замацаваў маю пэнсію ў старым памеры, і яна паказвае, якая інфляцыя ў Беларусі. Цяпер яна складае 3200 рублёў, крыху больш за адзін даляр”.
Лябедзька: Пакуль з адпачынкам ніяк, значыць — ня вельмі добра з працай.

Спадар Шушкевіч мяркуе, аднак, правесьці адзін зь летніх месяцаў у Аўстраліі. Гэта адзіны кантынэнт, дзе ён яшчэ ня быў. А ці часта ён бывае на сваім лецішчы?

“Пакуль што вольнага часу для лецішча не было. Ну вось учора мне ўдалося зьезьдзіць на лецішча зь сябрамі, бо я хачу там зрабіць яшчэ адзін пакойчык, дык я купіў дошкі, учора мы іх зручна пераклалі, каб яны падсохлі. Люблю гэтую справу, варушыцца люблю наогул”.

Старшыня АГП Анатоль Лябедзька пакуль плянуе адпачыць зімой:
М.Чаргінец: Лецішча вялікае, прадаць бы яго к чорту!..

“Хто як працуе, той так і адпачывае. У мяне пакуль з адпачынкам ніяк, значыць — ня вельмі добра з працай. Трэба лепш працаваць. Так што ўлетку я буду ў звычайным працоўным рэжыме. Паглядзім, можа, узімку, бо мне ўсё ж больш даспадобы зімовы адпачынак, чым летні. Можа, на тыдзень які вырвуся на лыжы ў горы. І гэтым кампэнсуем летні адпачынак”.

Пісьменьнік і палітык Мікалай Чаргінец пакуль яшчэ нават ня думаў пра адпачынак, бо вельмі шмат працы. Ён кажа, што калі і “вырвецца на дзён дзесяць, то будзе адпачываць, дзе давядзецца”. Вольны час ён стараецца праводзіць на лецішчы.

“Калі прыяжджаеш на лецішча а 10—11 вечара, а ў 6 устаеш — і на працу, то гэта ўжо не адчуваеш, што адпачыў. Радасьці няма дачнай. Маленькі гарод, бульбу не саджаў. Ёсьць два парнікі: у адным памідоры, у другім гуркі. Гэта ў раёне Раўбіцкага вадасховішча, толькі з адваротнага боку. Месца нядрэннае, ды толькі лецішча вялікае, прадаць бы яго к чорту. Будаваў на 18 чалавек, такая ў мяне сям’я. А цяпер палова. І цяпер яно мяне не задавальняе ўжо па вялікіх памерах. Апошнія тры гады ніводнага разу нават не пакупаўся, хаця блізка, 200 мэтраў да вады”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG