Лінкі ўнівэрсальнага доступу

Злоўлены меркаваны забойца журналіста Гангадзэ


Аляксей Пукач

Аляксей Пукач

Супрацоўнікі Генэральнай пракуратуры Ўкраіны разам з прадстаўнікамі службы бясьпекі затрымалі колішняга кіраўніка крымінальнай выведкі МУС Украіны Аляксея Пукача, якога абвінавачваюць у забойстве журналіста Георгія Гангадзэ.

Пукача затрымалі 21 ліпеня ў Жытомірскай вобласьці. Цяпер ён знаходзіцца ў Галоўным сьледчым упраўленьні Генпракуратуры.

Летась апэляцыйны суд Кіеву прызнаў вінаватымі ў забойстве журналіста трох колішніх супрацоўнікаў дэпартамэнту зьнешняга назіраньня і крымінальнай выведкі МУС Украіны. Іх прысудзілі да 12 і 13 гадоў пазбаўленьня волі.

Яшчэ адзін абвінавачаны – колішні кіраўнік гэтага дэпартамэнту Аляксей Пукач – знаходзіўся ў вышуку. Замоўнікі забойства дагэтуль невядомыя.
Георгі Гангадзэ (архіўнае фота)

Генэральны пракурор Аляксандар Мядзьведзька заяўляў, што зьнікненьне Пукача, а таксама гібель колішняга міністра ўнутраных справаў Юр'я Краўчанкі ўскладняе расьследваньне крымінальнай справы пра арганізатарў забойства журналіста Гангадзэ.

Гангадзэ зьнік 16 верасьня 2000 году ў Кіеве. У лістападзе таго ж году ягонае абезгалоўленае цела было знойдзена ў лесе. Неўзабаве пасьля гэтага былы маёр дзяржаховы Мікалай Мельнічэнка абнародваў запісы, нібыта зробленыя ў габінэце тагачаснага прэзыдэнта Ўкраіны Леаніда Кучмы. На стужцы голас, падобны да Кучмавага, дае загад «разабрацца з журналістам».

Удава Георгія Гангадзэ Міраслава Гангадзе сёньня пракамэнтавала нашаму радыё арышт Пукача наступным чынам:

"Калі генэрал Пукач назаве замоўнікаў забойства, тады гэта будзе вельмі важна ня толькі таму, што будуць агучаныя гэтыя імёны, але і таму, што будзе можна сабраць доказы, якія могуць дапамагчы і адкрыць дарогу следзтву да выстаўленьня абвінавачаньня замоўнікам".

Паказаць камэнтары

XS
SM
MD
LG