Як лічаць сябры гэтай моладзевай палітычнай арганізацыі, цяпер толькі вельмі невялікі адсотак швэдаў ведае, што Беларусь — незалежная краіна, а ня частка Расеі ці выспа ў Ціхім акіяне. І толькі адзінкі ў Швэцыі называюць краіну Belarus, а не Vitryssland (“Белая Расея”).
“Надышоў час пазнаёміцца зь Беларусьсю. Мы таксама хочам зрабіць усё, каб людзі, якія жывуць ва ўмовах “апошняй дыктатуры Эўропы”, ведалі пра падтрымку і салідарнасьць звонку”, — кажуць прадстаўнікі LS.
Сябры арганізацыі выступаюць за тое, каб як мага болей швэдзкіх палітыкаў і журналістаў адкрылі для сябе гэтую “закрытую”, паводле вызначэньня Freedom House, краіну. Швэдзкія мэдыі павінны ня толькі зьмяшчаць больш уласнай інфармацыі пра Беларусь, але і даваць слова беларускім дэмакратычным палітыкам і журналістам. Цяперашні стан інфармаваньня швэдзкіх мэдыяў пра гэтую краіну ў цэнтры Эўропы LS ацэньвае як “вельмі кепскі”.
Сябры LS таксама падтрымліваюць распачатую нядаўна ў Швэцыі кампанію, каб зьмяніць афіцыйную швэдзкую назву Беларусі (Vitryssland). Назва гэтая дакладна перакладаецца як “Белая Расея”, што ўводзіць у зман. Разам зь іншымі прадстаўнікамі швэдзкай грамадзкасьці яны таксама паставілі свае подпісы пад адпаведным зваротам швэдзкіх беларусаў на адрас Міністэрства замежных спраў Швэцыі, швэдзкай Моўнай рады і Швэдзкай Акадэміі.
“Лібэральныя студэнты Швэцыі” заклікаюць прадстаўнікоў іншых краін, дзе назва Рэспублікі Беларусь таксама перакладаецца як “Белая Расея”, а беларусаў блытаюць з расейцамі, распачаць кампанію па зьмене афіцыйнай назвы гэтай краіны.