Лінкі ўнівэрсальнага доступу

Псыхоляг часткі, які пакараў Франка Вячорку некалькімі пазачарговымі нарадамі за друкаваньне дзёньніка ў інтэрнэце, сам шукае сабе праз інтэрнэт працу ў Расеі.

Днямі вайсковец з відэакамэрай рабіў ператрус рэчаў у Франкавай тумбачцы. Тым часам Зьміцер Хведарук і Іван Шыла атрымалі палёгку ў зьвязку з захворваньнямі.

Франак Вячорка
Франак Вячорка два тыдня запар адчувае моцны ціск з боку псыхоляга часткі Дзяніса Казака. Вайсковец некалькі разоў караў Франка пазачарговымі нарадамі, калі ў інтэрнэце зьяўляліся старонкі дзёньніка пра вайсковую службу. Сп.Казак казаў бацьку Франка пра адпаведныя законы, якія забараняюць вайскоўцам зьмяшчаць якую-небудзь інфармацыю без дазволу кіраўніцтва. Ад самага пачатку ўсе праблемы службы ў войску ў Франка былі зьвязаныя менавіта з публікацыямі ў сусьветнай павуціне.

Сябры Франка былі вельмі зьдзіўленыя, калі знайшлі ў інтэрнэце на расейскіх сайтах пошуку працы рэзюмэ Дзяніса Казака. Вайсковец характарызуе сябе як сьціплага і адукавана чалавека, які пры гэтым можа добра абыходзіцца са зброяй. Пры гэтым сп.Казак просіць даць яму працу з заробкам у 35 000 расейскіх рублёў. На сайце фатаздымак вайсковага псыхоляга ў белым строі за барнай стойкай.

Гаворыць Вінцук Вячорка:

“Мне, вядома, цікава ведаць наколькі ўзгадняць інтэрнэт-публікацыі распаўсюджваецца на ўсіх вайскоўцаў. Што да сп.Казака, то ў ягоных руках цяпер жыцьцё і лёс майго сына.

Вядома, я быў зьдзіўлены, пабачыўшы на расейскім сайце рэзюмэ. Безумоўна, той факт, што ў Франка раптоўна ўзьніклі праблемы з беларускай мовай, я ня мог патлумачыць чаму.Цяпер я разумею, што, калі чалавек зарыентаваны на Расею, шукае там працу, то, відаць, ёсьць нейкія пытаньні, зьвязаныя з беларускім патрыятызмам, ну, і, можа, з армейскім патрыятызмам таксама”.

Зьміцер Хведарук
Зьміцер Хведарук зьвярнуўся да мэдыкаў па дапамогу. Маці Зьмітра Ірына Хведарук паведаміла, што можа размаўляць са сваім сынам толькі зь іншых тэлефонаў. Калі ж ён тэлефануе на яе нумар, то размова заканчваецца праз 10 сэкундаў.

“Прывезла ў частку раздрукоўкі закона пра мову, Канстытуцыю. Дваякае стаўленьне. Нехта абураецца, а нехта... Прыходзяць і запытваюць: А ну, скажы, як ты там па-беларуску “сьмірна”крычыш”. Кажа: “Зважай!”. “А, што, прыкольна”. І так кажуць. Адмаўляюць у асноўным тыя, якія не надта разьвітыя. Папросту хлопцы нічога ня бачылі”.

Іван Шыла
Іван Шыла, які служыць пад Лепелем, трапіў у шпіталь.

Гаворыць маці Івана Сьвятлана Шыла.

“Алергія ў яго нейкая на ўколы. Не было лекаў, дык яму рабілі нейкія ўколы. Вось ён цяпер ў шпіталі ляжыць. Мы перадалі ў частку тавігіл і яму цяпер стала лягчэй.

Непакоімся за яго. Паедзем у нядзелю. Спадзяюся, што яго не паставяць адразу ў нарад, калі выпішуць. Пакуль не ўбачу яго, не паеду дадому. Мы і так яго тры тыдні ня бачылі.

Іван любіць дранікі. Дык я яму ад раніцы напяку і прывязу, каб цёпленькія былі”.

У справе Івана Шылы яшчэ не прызначана дата разгляду скаргі на рашэньне салігорскага суду, які адбыўся ў адсутнасьць Івана. Як і ў справах Франка Вячоркі і Зьмітра Хведарука суд прызнаў дзеяньні вайскоўцаў і мэдыкаў падчас гвалтоўнага прызыву законнымі.

Паказаць камэнтары

XS
SM
MD
LG