У Менску адкрыўся V зьезд беларусаў сьвету

Праграма першага дня зьезду ўключае пленарнае і сэкцыйныя паседжаньні, выступы прадстаўнікоў дзяржструктур і сьвяточны канцэрт. У другі дзень заплянаваныя сустрэчы дэлегатаў з прадстаўнікамі міністэрстваў і ведамстваў, прэзэнтацыя кніг, сустрэча з творчай інтэлігенцыяй, прыняцьце выніковых дакумэнтаў, выбары кіруючых органаў і прыём у ганаровыя сябры аб’яднаньня, паведамляе БелаПАН.

Як адзначыла напярэдадні старшыня рады згуртаваньня "Бацькаўчшына" Алена Макоўская, зьезд “Бацькаўшчыны” — гэта ня проста справаздачна-выбарчае мерапрыемства, а тэматычны сход, які мае вырашыць цэлы шэраг надзённых пытаньняў.

“Мы лічым, што тэма нацыянальнай ідэнтыфікацыі беларусаў сёньня вельмі востра стаіць у Беларусі ў сувязі з працэсамі русыфікацыі, у сувязі з тым, што беларуская мова выводзіцца з усіх сфэраў ужытку, у сувязі з тым, што беларусы наагул вельмі слаба нацыянальна ідэнтыфікаваныя. Сустракаючыся з тым фактам, што мы пастаянна губляем свой інтэлектуальны патэнцыял, свой эканамічны патэнцыял, тых людзей, якія маглі б ствараць нашы іміджавыя цэнтры па-за межамі краіны, мы ня можам застацца ўбаку, назіраючы за гэтымі працэсамі. І таму мы ставім менавіта тэму нацыянальнай ідэнтыфікацыі важнай тэмай зьезду”.

Зьезд праходзіць ў Міжнародным адукацыйным цэнтры (IBB).