Лінкі ўнівэрсальнага доступу

Расьцяжка ў Віцебску: “Крымінал Сьвеціка сфабрыкаваны”


Расьцяжка ў падтрымку Леаніда Сьвеціка

Расьцяжка ў падтрымку Леаніда Сьвеціка

Расьцяжка са словамі “Крымінал Сьвеціка сфабрыкаваны” зьявілася сёньня на фасадзе жылога 12-павярховага дома на скрыжаваньні Маскоўскага праспэкту і вуліцы Чкалава.

У абласным судзе праходзіць 12-е пасяджэньне па справе віцебскага праваабаронцы Леаніда Сьвеціка, якога судзяць паводле выстаўленага КДБ абвінавачаньня ў распальваньні міжнацыянальнай і рэлігійнай варожасьці. Апазыцыйная моладзь горада вырашыла такім чынам падтрымаць праваабаронцу, у чыю вінаватасьць віцебскія актывісты ня вераць.

Сябры КХП БНФ Ян Таўпыга і Ян Дзяржаўцаў, якія маюць статус пацярпелых, заявілі хадайніцтвы пра адвод судзьдзі Галіны Ўрбановіч. На іхную думку, яна сьвядома ўхіляецца ад таго, каб удакладняць акалічнасьці справы, і стаіць на баку абвінавачаньня.

Леанід Сьвецік.
9 красавіка 2009 году
Праваабаронца Леанід Сьвецік, якога вінавацяць у тым, што ён меў дачыненьне да напісаньня і распаўсюджваньня лістоў ад імя віцебскай філіі “Русского Національного Едінства”, працягвае адмаўляць сваю віну. На сёньняшнім пасяджэньні ён хадайнічаў, каб экспэрты, запрошаныя абласной управай КДБ, удакладнілі вынікі экспэртызы лістоў, атрыманых чатырма жыхарамі Віцебску ў 2006 годзе. Бо картрыдж для друкаркі, канфіскаваны падчас ператрусу ў кватэры праваабаронцы, з дапамогай якога лісты ад РНЕ нібыта былі надрукаваныя, выраблены годам пазьней, у 2007 годзе.

Судзьдзя Галіна Ўрбановіч заявіла, што зараз гэта высьвятляць немэтазгодна, адхіліўшы і гэтае, і шэраг іншых хадайніцтваў. У тым ліку і наконт дактыляскапічнай экспэртызы, якая дапамагла б высьветліць, ці ёсьць на лістах ад імя РНЕ адбіткі пальцаў Леаніда Сьвеціка.

На думку праваабаронцы, крымінальны перасьлед з боку КДБ і гэты судовы працэс — помста за ягоную дзейнасьць. Цягам 2006—2007 гадоў ён кансультаваў тых, хто атрымліваў лісты з пагрозамі за апазыцыйныя палітычныя погляды, разам зь віцебскімі актывістамі патрабуючы, каб КДБ і міліцыя знайшлі тых, хто дасылае лісты ад імя РНЕ. З адпаведных структур прыходзілі адмовы са спасылкамі на тое, што РНЕ — незарэгістраванае грамадзкае ўтварэньне, якога не існуе ў Віцебску, аж пакуль у траўні 2008 году абласная ўправа КДБ не завяла крымінальную справу супраць самога Леаніда Сьвеціка.

Калі суд прызнае праваабаронцу вінаватым, паводле часткі 1 артыкула 130 яму пагражае тэрмін зьняволеньня да 5 гадоў.
XS
SM
MD
LG