Лінкі ўнівэрсальнага доступу

logo-print
Аляксандар Лукашэнка падпісаў указ аб памілаваньні Эмануіла Зэльцэра, грамадзяніна ЗША, чыйго вызваленьня на гуманных падставах настойліва дамагаўся амэрыканскі ўрад.

Вызваліць Эмануіла Зэльцэра Аляксандар Лукашэнка паабяцаў сёньня, 30 чэрвеня ў размове з амэрыканскімі кангрэсмэнамі, прычым паабяцаў зрабіць гэта “ўжо цягам дня”. Аднак амаль да вечара афіцыйныя крыніцы ў Менску маўчалі пра тое, ці прынятае адносна Зэльцэра нейкае рашэньне. Блізу 17 гадзіны прэсавы сакратар кіраўніка дзяржавы Павал Лёгкі паведаміў “Свабодзе”:

“Так, магу пацьвердзіць, што Аляксандар Лукашэнка сапраўды падпісаў указ аб памілаваньні Эмануіла Зэльцэра”.

Эмануіл Зэльцэр зараз знаходзіцца ў магілёўскай калёніі № 15, яго трымаюць у мэдычнай частцы калёніі. Калі амэрыканец выйдзе на волю? З гэтым пытаньнем я зьвярнуўся да адваката Зэльцэра — Зьмітра Гарачкі, які зараз знаходзіцца ў Магілёве. Адвакат, аднак, ня мае інфармацыі пра тое, калі вызваляць ягонага падабароннага:

“Ніякай інфармацыі няма”.

Брат Зэльцэра Марк, які жыве ў Нью-Ёрку, уважліва сочыць за падзеямі ў Менску і Магілёве вакол ягонага брата, якога лічыць ахвярай барацьбы вакол спадчыны памерлага грузінскага алігарха Бадры Патаркацышвілі. Зэльцэр быў адвакатам Патаркацышвілі, раптоўна памёрлага ў лютым 2008 году.

Марк Зэльцэр гэтак пракамэнтаваў навіну пра ўказ аб памілаваньні ягонага брата:

“Кожны дзень бы такое!.. Не, зразумела, што пакуль я яго не пабачу, казаць канчаткова рана. Сёньня першы дзень, калі такі прасьвет. Спадзяюся, мы яго прывядзем у належны стан. Празь лекараў, харчаваньне, любоў. Гэта былі самыя дрэнныя 15 месяцаў ягонага жыцьця, а ўсё астатняе будзе сьветлым”.

Эмануіл Зэльцэр быў арыштаваны летась 16 сакавіка, прыляцеўшы зь Лёндана ў Менск, і асуджаны беларускім судом на 3 гады зьняволеньня за камэрцыйны шпіянаж і падробку дакумэнтаў. Ужо вядома, што Зэльцэр прыляцеў у Менск на асабістым самалёце расейскага алігарха-ўцекача Барыса Беразоўскага. Марк Зэльцэр мяркуе, што Беразоўскі і справакаваў арышт ягонага брата, а таксама — што расейскі алігарх прэтэндуе на частку маёмасьці Патаркацышвілі. Барыс Беразоўскі гэтыя абвінавачаньні абвяргае і не камэнтуе зьвесткі, паводле якіх летась ён прылятаў у Менск на працэс над Зэльцэрам і нават сустракаўся зь ім у турме. Я спытаўся ў Марка Зэльцэра: якім, на яго думку, будзе наступны крок Барыса Беразоўскага?

“Я ведаю, што, на жаль, людзі Беразоўскага знаходзяцца цяпер у Менску. Канечне, гэта для іх ня самая лепшая навіна. Самае галоўнае, каб ён спакойна выехаў з краіны і прыехаў у ЗША. Тут мы пра яго паклапоцімся”.

У амбасадзе ЗША ў Беларусі не даюць камэнтароў пра захады дзеля выезду Эмануіла Зэльцэра ў ЗША.

Ваша меркаваньне

Паказаць камэнтары

XS
SM
MD
LG