Лінкі ўнівэрсальнага доступу

Загінула экс-чэмпіёнка сьвету Зінаіда Стагурская


Зінаіда Стагурская

Зінаіда Стагурская

Трагедыя адбылася падчас трэніроўкі. Перад чэмпіянатам Беларусі, які распачаўся ў Лагойску, спартоўка прыехала на некалькі дзён у Віцебск, дзе яна нарадзілася.

Чэмпіёнка сьвету 2000 году і пераможца шматлікіх міжнародных спаборніцтваў у шашовых гонках загінула ў дарожна-транспартным здарэньні 25 чэрвеня на 93-м кілямэтры аўташашы “Мяжа Расейскай Фэдэрацыі – Віцебск – Гомель”.

Аўтамабіль “Хонда ЦР-В”, якім кіравала жыхарка Санкт-Пецярбургу, выехаў на паласу сустрэчнага руху, дзе на машыне “ВАЗ-2104” рухаўся трэнэр Зінаіды Стагурскай, а за ім на адлегласьці 10 мэтраў ехала спартоўка. Машыны разьмінуліся, а раварыстка трапіла пад колы “Хонды” і сканала на месцы.

Кіроўца “Хонды” знаходзіцца ў Віцебскім абласным клінічным шпіталі.

З факту гібелі Зінаіды Стагурскай у Віцебскай абласной управе МУС завялі крымінальную справу паводле часткі 2 артыкулу 137 – “Парушэньне правілаў дарожнага руху”. Згодна з гэтым артыкулам, вінаватага можа чакаць да 5 гадоў пазбаўленьня волі.

Паводле супрацоўнікаў міліцыі, спартоўка стала ахвярай здарэньня, нягледзячы на тое, што выканала ўсе ўмовы, прадугледжаныя правіламі дарожнага руху для раварыстаў. Зінаідзе Стагурскай было 38 гадоў.

Паказаць камэнтары

XS
SM
MD
LG