Лінкі ўнівэрсальнага доступу

logo-print
Беларусь заняла чацвёртае месца сярод краін былога СССР у тэмпах росту афіцыйнага курсу даляра ЗША да нацыянальнай валюты за першыя чатыры месяцы 2011 году. Пра гэта сьведчыць праведзены БелаПАН аналіз курсаў на 31 сьнежня 2010 году і 30 красавіка 2011 году.

У пяцёрку краін, дзе даляр падаражэў, увайшлі Ўзбэкістан — тут курс узрос на 3,14% (з 1.640 да 1.691,57 сума), Таджыкістан — на 2,33% (з 4,4031 да 4,5059 самоні), Армэнія — на 1,88% (з 363,44 да 370,27 драма), Беларусь — на 0,43% (з 3.000 да 3.013 рублёў) і Украіна — на 0,05% (з 7,9617 да 7,9654 грыўны).

У Туркмэністане курс даляра не зьмяніўся (2,85 маната).

Амэрыканская валюта патаньнела ў Кыргызстане — на 0,68% (з 47,0992 да 46,7766 сома), Азэрбайджане — на 0,79% (з 0,7979 да 0,7916 маната), Казахстане — на 1,33% (са 147,50 да 145,54 тэнге), Малдове — на 5,06% (з 12,1539 да 11,5386 лея), Грузіі — на 7,45% (з 1,7728 да 1,6408 лары), Расеі — на 9,76% (з 30,4769 да 27,5022 рубля), Эстоніі — на 10,09% (з 0,7484 да 0,6729 эўра), Літве — на 10,85% (з 2,6099 да 2,3266 літа) і Латвіі — на 11,59% (з 0,535 да 0,473 лата).

У самаабвешчанай Прыднястроўскай Малдаўскай Рэспубліцы, дзе маецца свая валюта, курс даляра павялічыўся за месяц і з пачатку году на 0,98% (з 10,2 да 10,3 рубля).

У красавіку афіцыйны курс даляра ў Беларусі зьнізіўся на 1,05% (рыначныя каціроўкі вышэйшая на 20-80%). Гэта сёмы паказчык пасьля Літвы (5,23%), Латвіі (5,21%), Эстоніі (4,40%), Грузіі (3,82%), Расеі (3,26%) і Малдовы (3,12%). Каціроўка амэрыканскай валюты зьменшылася таксама ў Кыргызстане (на 0,99%), Азэрбайджане (на 0,14%) і Казахстане (на 0,11%); не зьмянілася — у Туркмэністане. Даляр падаражэў у Таджыкістане (на 0,91%), ва Ўзбэкістане (на 0,63%), у Армэніі (на 0,16%) і ва Ўкраіне (на 0,07%).

У 2010 годзе Беларусь заняла сёмае месца сярод краін былога СССР у тэмпах росту афіцыйнага курсу даляра ЗША да нацыянальнай валюты (на 4,79%), у 2009 годзе — першае (на 30,14%), у 2008 годзе — дзявятае (на 2,33%).

Паказаць камэнтары

XS
SM
MD
LG