Лінкі ўнівэрсальнага доступу

Эўрадэпутат Марэк Мігальскі узяў «шэфства» над Зьмітром Бандарэнкам


Марэк Мігальскі, дэпутат Эўрапейскага парлямэнту ад Польшчы, прадстаўнік дэлегацыі Эўрапарлямэнту па дачыненьнях зь Беларусьсю, узяў "шэфства" над палітзьняволеным Зьмітром Бандарэнкам у рамках кампаніі праваабарончай арганізацыі Libereco.

Абвяшчаючы пра сваё рашэньне, Марэк Мігальскі сказаў:

Марэк Мігальскі
x
Марэк Мігальскі
"Я б хацеў выказаць маю рашучую падтрымку аднаму з палітвязьняў, Змітру Бандарэнку, якога прысудзілі да двух гадоў калёніі за ўдзел у дэманстрацыі пратэсту супраць сфальсыфікаваных вынікаў прэзыдэнцкіх выбараў 19 сьнежня 2010 году. Я захапляюся яго мужнасьцю і яго дзейнасьцю. Зьміцер Бандарэнка змагаўся з рэжымам на працягу доўгага часу; падчас выбараў 2010 году ён быў каардынатарам кампаніі «Эўрапейская Беларусь» і даверанай асобай кандыдата Андрэя Саньнікава. Суд над Зьмітром Бандарэнкам не адпавядаў дэмакратычным стандартам. Відавочна, што прысуд суду палітычна матываваны. Я настойліва заклікаю ўлады Беларусі зьняць абвінавачаньні са Зьмітра Бандарэнкі і патрабую яго вызваленьня".

Кампанія «Шэфства над палітвязьнямі» была ініцыяваная праваабарончай арганізацыяй Libereco – Partnership for Human Rights для падтрымкі беларускіх палітзьняволеных і іх сем'яў.

Раней на гэтым тыдні дэпутат Бундэстагу ад фракцыі зялёных, каардынатар у пытаньнях Усходняй Эўропы Марылюіза Бэк узяла шэфства над былым кандыдатам на прэзыдэнцкіх выбарах Андрэем Саньнікавым.

Мэта Libereco — каб кожны палітвязень у Беларусь атрымаў такую маральную ды палітычную шэфскую падтрымку з боку нямецкіх парлямэнтароў.

Як паведамілі "Свабодзе" ў бюро Марылюізы Бэк, жаданьне падтрымаць беларускіх палітвязьняў маюць прадстаўнікі амаль усіх фракцыяў Бундэстагу.
XS
SM
MD
LG