Лінкі ўнівэрсальнага доступу

Прыехалі ў Беларусь, а трапілі ў няволю


Суд Фрунзенскага раёну.

Суд Фрунзенскага раёну.

26 красавіка Фрунзенскі суд Менску аштрафаваў на 525 — 700 тысяч рублёў удзельнікаў пікету супраць будаўніцтва атамнай электрастанцыі ў Беларусі. Сярод пакараных грамадзяне Беларусі, Нямеччыны і Польшчы.

12 з амаль 25 удзельнікаў пікету, які адбыўся 25 красавіка ў Менску ў раёне менскай станцыі мэтро «Пушкінская», былі затрыманыя міліцыянтамі і правялі ноч у турме на Акрэсьціна. Яны зьяўляюцца актывістамі экалягічных і сацыяльных рухаў, а таксама анархісты. Сёньня іх судзілі за ўдзел у несанкцыянаваным пікеце.

Працэсы працягваліся да позьняга вечара. Удзельнікаў акцыі абвінавацілі ў тым, што яны знаходзіліся на прыпынку транспарту, перашкаджалі руху грамадзянаў, трымалі ў руках расьцяжку белага колеру з надпісам «Мы супраць ядзернага рэактару», выкрыквалі лёзунгі і прыцягвалі да сябе ўвагу. Такія паказаньні давалі сьведкі-міліцыянты, якія затрымлівалі ўдзельнікаў пікету. Сёньня ў Фрунзенскім судзе іх прызналі вінаватымі і аштрафавалі. Яшчэ аднаго актывіста Ігара Трухановіча затрымалі 26 красавіка каля будынку суду, калі ён спрабаваў фатаграфаваць, і зьвярнуўся з пытаньнямі да міліцыянта.

Аляксандар Ярашэвіч распавёў, што 25 красавіка ўдалося зладзіць пікет каля ўнівэрсаму «Рыга» і там ніхто ня быў затрыманы. А потым усе паехалі да станцыі мэтро «Пушкінская», дзе вырашылі зладзіць яшчэ адну акцыю супраць будаўніцтва атамнай электрастанцыі ў Беларусі:

«Як толькі пачалі разгортваць расьцяжкі, да іх пад’ехаў аўтобус з супрацоўнікамі міліцыі ў цывільным і адразу ўсіх запхнулі ў гэты аўтобус. Затрымалі 12 чалавек. Сярод іх 6 грамадзянаў Нямеччыны, адна грамадзянка Польшчы і пяць беларусаў. Усе разам яны рабілі сумесны пікет супраць будаўніцтва АЭС, за дзень да „чарнобыльскага“ дня. Замежныя актывісты вырашылі падтрымаць мясцовых, бо ў сваёй краіне яны таксама змагаюцца супраць АЭС, каб тыя зачынілі і новых не будавалі. Каля амбасады Беларусі ў Нямеччыне адбылася спантанная акцыя салідарнасьці, людзі прыйшлі да амбасады патрабаваць, каб затрыманых у Беларусі адпусьцілі».

Нас амаль што не кармілі і не было чаго піць. Было вельмі халодна і немагчыма было спаць.
Грамадзянка Нямеччыны Гюдэ Хансан сваю віну ў судзе не прызнала. Калі адвакатка спыталася сьведкаў-міліцыянтаў, на якой мове Хансан выкрыквала лёзунгі, міліцыянты сказалі, што ня памятаюць. Адвакатка прасіла апраўдаць падабаронную, бо доказаў яе віны ў судзе не ўстаноўлена. Аднак судзьдзя Сьвятлана Місуна аштрафавала дзяўчыну на 700 тысяч рублёў. Гюдэ Хансан згадвае, што падчас затрыманьня не былі патлумачаныя юрыдычныя падставы і не было належнага перакладу:

«Нас зусім не кармілі і не было чаго піць. Спальныя месцы былі вельмі дрэнныя, драўляныя нары. На іх можна было толькі ляжаць, не было покрыўкі. Было вельмі халодна і немагчыма было спаць».

Беларусам далі штрафы таксама па 700 тысяч рублёў, і толькі Аляксандру Бугаёву — 525 тысяч рублёў. Аляксандар Ярашэвіч адзначае, што ў адрозьненьне ад Беларусі зладзіць пікет у Нямеччыне ня так складана:

«На фоне падзей, якія адбываліся раней, такія прысуды ня вельмі цяжкія, але гэта таксама грашовыя выдаткі, трэба думаць, дзе гэтыя грошы знайсьці, каб аплаціць. Але гэта лепей, чым сядзець на сутках».

Паказаць камэнтары

XS
SM
MD
LG