Лінкі ўнівэрсальнага доступу

Крызісу ў банкаўскай сфэры Беларусі ня будзе. Пра гэта сёньня афіцыйна заявіў старшыня праўленьня Нацыянальнага банку Беларусі Пётар Пракаповіч. Былы банкір Багданкевіч прагназуе новую дэвальвацыю беларускага рубля.

СЛУХАЦЬ:


Пётар Пракаповіч
паабяцаў стабільнасьць. Найперш гэта тычыцца курсу беларускага рубля ў кошыку валют (даляр, эўра, расейскі рубель) і далейшага крэдытаваньня эканомікі. Нават пэўныя складанасьці з экспартам беларускай прадукцыі гэтаму не перашкодзяць, казаў сёньня старшыня праўленьня Нацбанку:
Пётар Пракаповіч

“Мы павінны працаваць над выкананьнем Асноўных напрамкаў грашова-крэдытнай палітыкі, якія зацьверджаныя ўказам кіраўніка дзяржавы летась. І яны павінны забясьпечыць банкаўскае суправаджэньне эканамічнага росту ў памеры 10—12%”.

Спадар Пракаповіч таксама казаў, што да ўсялякіх парадаў прыслухоўвацца не зьбіраецца:

“Плюс-мінус 5% — гэта гарантыя стабільнасьці нацыянальнай валюты, якая будзе цягам гэтага году. Адступленьня ад гэтага ня будзе, перагляду, у той ці другі бок, таксама ня будзе. Мы не прымаем парады, якія нам даюць: павялічыць дэвальвацыю, пашырыць калідор да 10—15% і г.д. Рашэньне, якое прынялі 2 студзеня, найбольш аптымальнае. І мы яго пераглядаць ня будзем.

Што тычыцца працы ў другім квартале, дык тут мы будзем працаваць, каб калідор стаў вузейшым. Будзем працаваць у памеры плюс-мінус 1% цягам другога кварталу”.

Былы старшыня Нацыянальнага банку Беларусі прафэсар Станіслаў Багданкевіч шчыра прызнаецца: немагчыма зразумець, што адбываецца ў эканоміцы краіны. Калі глядзець на афіцыйныя лічбы, то ўсё выглядае ня проста добра, а нават цудоўна. А насамрэч нешта тут ня так, разважае прафэсар:
Станіслаў Багданкевіч

“Прамысловасьць працуе на склад. Астаткі складзкіх запасаў на 1 красавіка машынабудаваньне падвоіла, у нафтахіміі яны нават больш чым падвоіліся. Дык, як я разумею, ня будзе вяртаньня крэдытаў, калі няма рэалізацыі. Ну сапраўды, калі тавары не прадаюцца, дык чым пагашаць пазыкі? Гэта ж — наўпроставая залежнасьць.

А я слухаю Пятра Пракаповіча і чую, што ў нас доля сумнеўных крэдытаў, то бок пратэрмінаваных і пралянгаваных, складае толькі 1% ад усіх крэдытаў. Гэта ж фантастыка! Я ў гэта ня веру. Але ж афіцыйныя лічбы такія. І я сёньня іх зноў глядзеў. Усё — па-ранейшаму. Альбо яны гэта знарок утойваюць, альбо ня маюць дакладнай інфармацыі, альбо супакойваюць грамадзтва. Вось гэтага я не разумею. Галоўнае пытаньне: ці будзе крызіс у банкаўскай сфэры? А ён мусіць быць”.

Экс-старшыня праўленьня Нацбанку прагназуе новую дэвальвацыю беларускага рубля:

“Калі дэфіцыт гандлёвага балянсу, афіцыйна абвешчаны, складае 1 мільярд 866 мільёнаў за квартал і ён павялічыўся параўнальна зь мінулым годам за гэты ж час у два з паловай разы, дык гэта азначае, што папярэдняя дэвальвацыя нічога не дала. А значыць, трэба новую праводзіць”.
XS
SM
MD
LG