Лінкі ўнівэрсальнага доступу

На Магілёўшчыне павялічылася колькасьць беспрацоўных. Афіцыйныя крыніцы паведамляюць, што на 3300 вакансіяў прэтэндуе больш за пяць тысяч афіцыйна зарэгістраваных беспрацоўных.


Год таму вакансіяў было амаль на дзьве тысячы болей. Падзеньне запатрабаванасьці на працоўныя рукі чыноўнікі аблвыканкаму тлумачаць наступствамі сусьветнага крызісу й прапануюць беспрацоўным перавучвацца на будаўнікоў. Будаўнічай галіне вобласьці патрабуецца больш за шэсьцьсот чалавек.

“Улічваючы дастаткова гарантаванае стабільнае месца, а ў асобных арганізацыях нядрэнны заробак, — сярод тых хто будзе накіроўвацца на перападрыхтоўку, мы бачым перадусім маладых людзей”, — цьвердзіць прадстаўнік аблвыканкаму.

Што да заробкаў, то будаўнік на Магілёўшчыне не зарабляе й дзевяцісот тысяч рублёў.

Пётар Руднік
Наагул жа сярэдні памер заробкаў у рэгіёне найменшы ў Беларусі — 780 тысяч рублёў. Паводле старшыні Магілёўскага аблвыканкаму Пятра Рудніка, сёлета істотнага росту заробкаў чакаць ня варта:

“У першапачатковым бюджэце, які мы прымалі пры канцы мінулага году, мы плянавалі павышэньне сярэдняга заробку на 18,2 працэнта. У новым бюджэце мы закладаем плюс пяць працэнтаў”.

Чыноўнікі прызнаюць таксама, што ў выніку фінансавага крызісу бюджэт рэгіёну недаатрымаў 630 мільярдаў рублёў. Падае і рэнтабэльнасьць прадпрыемстваў. Толькі ў Магілёве яна зьменшылася ў два з паловай разы.

“Летась у нас рэнтабэльнасьць у горадзе была 7,2 працэнты, а сёлета 2,9”, — прызнае супрацоўніца аддзелу эканомікі гарвыканкаму.

У абласным цэнтры 53 прадпрыемствы стратныя.

Хто забясьпечыць акрэсьлены Пятром Руднікам рост заробкаў? Пасьпяховыя прадпрыемствы, цьвердзіць незалежны эканаміст Пётар Мігурскі:

Пётар Мігурскі
“У нас шмат высокарэнтабэльных прадпрыемстваў. Але ніводнае зь іх не працуе паводле прынцыпу самафінансаваньня. Усё адно яны зьвяртаюцца да крэдытаў. Прыбытак у іх вялікі, але, як правіла, яго забірае дзяржава. Альбо празь ціск — “Падымайце заробкі. Падымайце заробкі” — патрабуюць ад іх, каб паказаць што сярэдні памер заробкаў ня дужа ўпаў”.
XS
SM
MD
LG