Як паведаміў БелаПАН актывіст ініцыятывы "StudAlliance" Кірыл Атаманчык, у звароце маладыя беларусы падкрэсьлілі, што паўстаньне 1863 года зьяўляецца значнай падзеяй ня толькі беларускай, але і польскай, літоўскай гісторыі. Кастусь Каліноўскі і іншыя паўстанцы змагаліся за незалежнасьць гэтых народаў. Таму грамадзкасьць непакоіць магчымы знос крыжа і мэмарыяльнай пліты ў гонар людзей, якія аддалі жыцьцё "за нашу і вашу свабоду".
"Толькі адзін праект зь сямі прапанаваных прадугледжвае захаваньне памятнага крыжа, — зазначыў Атаманчык. — Мы спадзяемся, што ўлады самым сур'ёзным чынам разгледзяць неабходнасьць пакінуць крыж на ранейшым месцы. У гэтым выпадку дзяліць няма чаго. Наш агульны герой загінуў менавіта тут. Асоба Каліноўскага стаіць у гісторыі асобна, таму і памятны знак яму павінен быць асобны".
Актывіст дадаў, што будзе ўважліва сачыць за абмеркаваньнем рэканструкцыі Лукішскай плошчы. У сакавіку 2009 года маладзёжныя актывісты правялі ў сталіцы Літвы акцыю "Паўстанцкі ланцуг", мэтай якой было прыцягненьне ўвагі грамадзкасьці да праблемы захаваньня памятных знакаў паўстаньня 1863 года.