Лінкі ўнівэрсальнага доступу

Віктар Макуць, галоўны мэханік кампаніі “Сьціф-Транс”, быў арыштаваны ў Ваўкавыску ў панядзелак і дастаўлены ў менскую турму на Акрэсьціна. Пакуль вядома толькі, што яго затрымалі ў справе Аўтуховіча.


СЛУХАЦЬ:


Алена Макуць, жонка затрыманага, распавядае, што ўчора прыехалі некалькі чалавек, рабілі ператрус у доме, прыбудоўцы і нават езьдзілі на лецішча. Знайшлі некалькі старых патронаў ад паляўнічай стрэльбы і забралі іх.

На думку спадарыні Макуць, яе мужа арыштавалі толькі за тое, што ён доўгі час працаваў разам зь Мікалаем Аўтуховічам. Зараз яна ў вельмі цяжкім стане і нават не магла назваць тых, хто забіраў яе мужа.

Макуць: “Забралі, і ўсё. Сказалі, што праз тры дні затэлефануюць і скажуць, якія прад’яўляюць абвінавачаньні. Прабачце, але больш я не магу гаварыць, не магу, усё...”

Яна дадала, што ў мужа высокі ціск нырак, а яна нават ня бачыла, ці ўзяў ён з сабою лекі. Сама яна зараз не працуе, а даглядае сваю старую маці, якая ляжыць паралізаваная і амаль страціла зрок.

У фірме “Сьціф-Транс” сёньня няма нікога з кіроўцаў, хто добра ведае Віктара Макуця — усе ў рэйсах. Але дыспэтчар коратка ахарактарызаваў яго наступным чынам.

Спадар: “Макуць — нармальны мужчына, сем’янін, у яго двое дарослых дзяцей, і папросту нармальны чалавек...”

Нагадаю, што Віктара Макуця ўжо дапытвалі 8 лютага — у той дзень, калі затрымалі Мікалая Аўтуховіча, Юрыя Лявонава і Ўладзімера Асіпенку.

Фірма “Сьціф-Транс” займаецца грузаперавозкамі і арандуе памяшканьне там, дзе працаваў Мікалай Аўтуховіч.

Алег Воўчак
Са слоў праваабаронцы Алега Воўчака, сьледчыя зараз заявілі, што тым разам Макуць мог нешта схаваць ад сьледзтва і не пра ўсё распавесьці.

“Хутчэй за ўсё, яго хочуць затрымаць на тры дні, каб атрымаць хоць нейкую інфармацыю пад псыхалягічным ціскам”.

Нагадаю, што 8 лютага ў Ваўкавыску былі арыштаваныя Мікалай Аўтуховіч, Юры Лявонаў і Ўладзімер Асіпенка. У іхных кватэрах адбыліся ператрусы, пасьля чаго ўсіх трох адвезьлі ў менскае СІЗА.

Паводле інфармацыі МУС, затрыманыя падазраюцца ў арганізацыі і зьдзяйсьненьні шэрагу цяжкіх злачынстваў. У прыватнасьці, было паведамлена пра падпалы і падрывы маёмасьці дзяржаўных службоўцаў.

Такім чынам яны нібыта помсьцілі за перасьлед іхнай фірмы. Пазьней БТ паведаміла, што пры ператрусах у затрыманых знайшлі выбухоўку і агнястрэльную зброю.

Усім тром прад'яўлены абвінавачанні паводле артыкула 218 Крымінальнага кодэксу (наўмыснае зьнішчэньне або пашкоджаньне маёмасьці).

Родныя арыштаваных кажуць, што ніякіх зьвестак пра ход сьледзтва ім не паведамляюць.
XS
SM
MD
LG