Лінкі ўнівэрсальнага доступу

Вэртыкальшчык заклікае спажываць з патрыятызмам


Адолець наступствы сусьветнага крызісу дапаможа спажывецкі патрыятызм. Так лічаць чыноўнікі Магілёўскага гарвыканкаму.

Віктар Шорыкаў
Старшыня Магілёўскага гарвыканкаму Віктар Шорыкаў запэўнівае, што нэгатыўныя тэндэнцыі ў эканоміцы абласнога цэнтру будуць пераадоленыя на працягу двух месяцаў.

Спажывец, калі набывае сваю прадукцыю, прадухіляе масавае беспрацоўе, заяўляе кіраўнік гарадзкой улады:

“Ёсьць такое слова, якое я люблю, бо добра яго разумею — „Патрыятызм“. Немцы набываюць толькі сваё ў гэты час. Перастаюць японскія машыны набываць, набываюць толькі нямецкія. Набываючы сваё, ён некаму дае працоўнае месца. Гэта ж дужа важна. Калі мы кажам — набывайце беларускае, гэта ня проста там нейкая фраза. Гэта ў першую чаргу, каб мы ня страцілі працоўных месцаў”.

Магілёўцы ня супраць быць патрыётамі айчынай прадукцыі, аднак прызнаюць, што найчасьцей перавагу аддаюць усё ж імпартнай:

Спадар: “Якасьць мяне асабіста ня дужа задавальняе. Дапусьцім, тыя ж красоўкі — яны дужа цяжкія. А такіх лёгенькіх у нас няма, альбо я проста ня бачыў, аднак і не заўважаў”.

Спадарыня: “Што тычыцца вопраткі, яна павінна быць больш сучаснай. Ну, мадэлі ў нас ня дужа. Можна схадзіць на рынак, паглядзець на фірменныя мадэлі й пашыць самім”.

Віктар Шорыкаў супакойвае, што масавага беспрацоўя гарвыканкам не дапусьціць:

“Перасоўваньне працоўных рэсурсаў унутры гораду — гэта дапушчальна й гэта можа быць. Мы прыхільнікі таго, каб не адбывалася скарачэньняў. Аднак гэта часовага характару сытуацыя, якая празь месяц-два зьменіцца ў лепшы бок”.

Паводле спадара Шорыкава, гарвыканкам ужо распрацаваў праграму пераадоленьня крызісу. Што за гэта праграма, пакуль невядома. Пра яе не было згадак ні ў афіцыйных крыніцах, ні ў выказваньнях чыноўнікаў.

Што да цяперашняга стану гарадзкой эканомікі, то за два сёлетнія месяцы колькасьць стратных прадпрыемстваў у параўнаньні зь мінулым годам вырасла ўтрая. Асноўная іх праблема — адсутнасьць абаротных сродкаў. Іх прадукцыя незапатрабаваная й застаецца на складах. Страты прадпрыемстваў толькі тэкстыльнай прамысловасьці складаюць тры мільярды рублёў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG