Лінкі ўнівэрсальнага доступу

“SOL Minsk” чакае ад Мар`яны Грузьдзіловіч “кампэнсацыі”


Марыяна Грузьдзіловіч

Марыяна Грузьдзіловіч

Настаўніца Мар`яна Грузьдзіловіч звольненая з камэрцыйнага адукацыйнага цэнтру “SOL Minsk” за тое, што гаварыла з вучнямі пра Дзень Волі. Радыё Свабода выслухала пазыцыю кіраўніцтва “SOL Minsk”.

Як мы ўжо паведамлялі, падставай для звальненьня стала дыскусія выкладчыцы ангельскай мовы з навучэнкай, якая заявіла, што ў Дзень Волі на вуліцы выходзяць “тупыя ўроды з апазыцыі” і нешта крычаць. Спадарыня Грузьдзіловіч не пагадзілася, заявіўшы, што сама наведвае апазыцыйныя акцыі і бачыць там пераважна інтэлігентных людзей. Аднак менавіта ў Дзень Волі загадам кіраўніцтва цэнтру выкладчыца была звольненая на падставе абвінавачаньня ў парушэньні статуту арганізацыі.

Зь якой фармулёўкай звольненая Мар`яна Грузьдзіловіч, я пацікавіўся ў дырэктара “SOL Minsk” Ванды Дармаян:

“Звольнілі за грубае парушэньне працоўнай дысцыпліны, за зьнявагу дзіцяці… Лепей, канечне, было б, каб вы пра ўсё запыталіся менавіта ў яе”.

Карэспандэнт: “Сваю вэрсію звальненьня яна ўжо агучыла...”

“Гэтую вэрсію мы чыталі, вэрсія абсалютна ілжывая. Нікому з выкладчыкаў не дазволена прыніжаць дзіця і абражаць чалавечую годнасьць. І даводзіць дзяцей да сьлёз”.

Мар`яна Грузьдзіловіч расказала, што ў часе размовы з завучам ёй было заяўлена, што кампанія апынулася на мяжы ліквідацыі. Пасьля канфлікту паміж выкладчыцай і вучаніцай пачаўся ціск на кіраўніцтва СШ № 212 у мікрараёне Сухарава, дзе арандуе плошчы адзін зь філіялаў цэнтру. Выявілася, што бацька пакрыўджанай дзяўчынкі — не апошняя асоба ў структуры МУС. Ці мог міліцэйскі палкоўнік паўплываць на лёс выкладчыцы?

“Для мяне бяз розьніцы — ці гэта дачка прыбіральшчыцы, ці каго іншага. Для мяне важна — правы дзіцяці, абараніць дзіця ад замахаў, ад зьнявагаў. Я ня ведаю, хто бацька дзяўчынкі, бо са скаргай зьвярнулася мама. Але гэта не адна скарга, таксама скарга паступіла ад калектыву бацькоў — на імя дырэктара 212-й школы”.

Аднак чаму прынятае такое пасьпешлівае рашэньне? Чаму не запатрабавалася ніякіх унутраных праверак па згаданых скаргах?

“Якая праверка? Мы сустрэліся, пагутарылі з бацькамі. Якая можа быць праверка, калі група бацькоў зьвярнулася, калі дзяўчынка ў сьлязах сышла дадому, усю ноч ня спала, калі гэтыя дзеці абураныя паводзінамі выкладчыка? Ва ўсім сьвеце выкладчыку забаронена абражаць дзяцей, прыніжаць іх чалавечую годнасьць”.

Мар`яна Грузьдзіловіч адпрацавала ў “SOL Minsk” амаль 11 гадоў, практычна ад часу, калі цэнтар зьявіўся ў Беларусі. Чаму да яе не было прэтэнзій увесь гэты час, а цяпер ужытыя такія радыкальныя захады?
Дырэктар: Мы будзем падтрыманыя цэнтральным офісам, адназначна.

“Так, 10 гадоў яна адпрацавала. Мы ведаем, што яна больш за 10 гадоў была ў “беларускім фронце”. І ніхто яе за палітычныя погляды ніколі не намагаўся звольніць. Але калі чалавек дайшоў ужо да такога, то я, канечне, заўсёды буду на баку правоў дзіцяці”.

“SOL Minsk” фармальна зьяўляецца рэгіянальным падразьдзяленьнем брытанскага цэнтру “Sharing One Language”. Ванда Дармаян кажа, што ў любым выпадку брытанцы зразумеюць вымушанасьць такога кроку:

“У Вялікай Брытаніі правы вучня стаяць на першым месяцы. Ажно да таго, што выкладчыка пазбавяць дыплёма, калі ён зрабіў замах на правы дзіцяці, асьмеліўся на занятках гаварыць пра сэкс, пра рэлігію, пра палітыку. То бок мы будзем падтрыманыя цэнтральным офісам, адназначна. Ва ўсім сьвеце забаронена выкладчыку глуміцца над перакананьнямі дзіцяці і закранаць вось гэтыя тры тэмы”.

Ці будзе “SOL Minsk” выплачваць кампэнсацыю звольненай за адзін дзень выкладчыцы?

“Якая кампэнсацыя? Маральная дзецям? Так, я ўжо папрасіла прабачэньня ў пісьмовым выглядзе перад усімі бацькамі за маральную шкоду, нанесеную выкладчыкам”.

Карэспандэнт: “А выкладчыку?”

“Выкладчыку? За што? За тое, што яна нанесла шкоду кампаніі, шкоду рэнамэ кампаніі? Ды выкладчыку трэба стаяць на каленях і прасіць прабачэньня перад бацькамі, перад кампаніяй, перад калегамі, што яна так падвяла кампанію і павяла сябе абсалютна неэтычна. Якая кампэнсацыя? За тое, што яна імідж кампаніі спрабуе разбурыць? Пра якую кампэнсацыю ідзе гаворка? А кампэнсацыя кіраўніку маральная, а бацькам? Я пісьмова прашу прабачэньня і вытлумачваюся перад бацькамі за яе антыпэдагагічныя паводзіны”.

Мар`яна Грузьдзіловіч ня мае сумневаў, што яе лёс быў вырашаны не ў “SOL Minsk”, а менавіта ў сям’і палкоўніка МУС. Праўда, называць прозьвішча вучаніцы, каб сапраўды не нашкодзіць дзяўчынцы, яна ня хоча:

“Мне адразу сказала завуч, што бацька той дзяўчынкі — палкоўнік МУС. А то адкуль жа я ведала б?”

“Але чаму так хутка адбылося звальненьне? Без аніякай праверкі?”
М.Грузьдзіловіч: Мне так было і сказана: мы вымушаныя ахвяраваць адной фігурай дзеля ўратаваньня кампаніі.

“Гэта, канечне, толькі прыкрыцьцё, што нібыта ўсе бацькі разам сталі за дзяўчынку. Мне так было і сказана: мы вымушаныя ахвяраваць адной фігурай дзеля ўратаваньня кампаніі. Ні пра якія інтарэсы дзяцей не было сказана ні слова. З-за таго, што вы, маўляў, крыўдзіце дзяцей, што дзяўчынка плакала — я гэта ўвогуле ад вас упершыню чую”.

Таксама выкладчыца абвяргае словы спадарыні Дармаян, якая заявіла, што 10 гадоў у адукацыйным цэнтры трымалі “бээнэфаўку”, а звольнілі выключна за антыпэдагагічныя паводзіны:

“Я ні ў якай партыі не была. У мяне проста такая грамадзянская пазыцыя. Я супраць той сытуацыі, якая цяпер адбываецца ў краіне. Так, я хадзіла на ўсе падобныя мерапрыемствы. Але яшчэ раз паўтараю: я ня сябра ніякай партыі, а БНФ — тым больш. У мяне такія перакананьні, але да ніякай партыі я не належу. Сваю пазыцыю я не хавала і ведала, што і яны пра мае перакананьні ведаюць”.

У брытанскім офісе “Sharing One Language” устрымаліся ад камэнтароў адносна сытуацыі, патлумачыўшы, што на гэты момант не валодаюць падрабязнасьцямі справы.

Паказаць камэнтары

XS
SM
MD
LG