Лінкі ўнівэрсальнага доступу

Польшча "за" 600 мільёнаў эўра для “Ўсходняга партнэрства”


Радаслаў Сікорскі
Радаслаў Сікорскі

Кіраўнік польскага МЗС Радаслаў Сікорскі заклікаў сваіх калегаў па ЭЗ падтрымаць асыгнаваньне дадатковых 600 мільёнаў эўра да 2013 году на разьвіцьцё праграмы “Ўсходняе партнэрства”.


На ўчорашняй прэсавай канфэрэнцыі ў Брусэлі ён адзначыў, што 600 мільёнаў эўра — гэта абсалютны мінімум для пэрыяду 2009—2013 гг., бо ў сярэднім гэта па 20 мільёнаў у год на кожную краіну. Калі ж крызіс працягнецца, то “пры пэсымістычным сцэнары давядзецца разглядаць праблему не на ўзроўні мільёнаў, а на ўзроўні мільярдаў”.

Чакаецца, што праект паглыбленьня дачыненьняў з постсавецкімі краінамі будзе зацьверджаны на цяперашнім саміце кіраўніцтва ЭЗ. Размова ідзе пра Ўкраіну, Малдову, Армэнію, Азэрбайджан, Грузію. У праекце таксама зарэзэрваванае месца і для Беларусі.

Як падаюць некаторыя СМІ, ня выключана, што галоўныя ініцыятары праграмы — Польшча, Швэцыя і шэраг сярэднеэўрапейскіх краін — могуць сутыкнуцца з супрацівам з боку паўднёваэўрапейскіх краін — Францыі, Партугаліі, Італіі. Прынцыпова гэтыя сябры ЭЗ падтрымліваюць “Усходняе партнэрства”, аднак яны занепакоеныя, што фінансаваньне праекту можа адбыцца за кошт зьмяншэньня дапамогі міжземнаморскім суседзям ЭЗ — Марока, Альжыру, Тунісу ды іншым.

Паведамляецца, што Парыж выступае супраць фіксацыі пэўнай сумы для “Ўсходняга партнэрства”. Паводле францускіх прадстаўнікоў на брусэльскай сустрэчы, у фінансаваньні праграмаў добрасуседзтва трэба захоўваць наступны балянс: дзьве траціны — для краін Міжземнамор’я і адна траціна — для постсавецкіх рэспублік. Такую лінію прэзыдэнт Нікаля Сарказі праводзіў яшчэ ў 2008 годзе, падчас прэзыдэнцтва Францыі ў ЭЗ.

Як заявіў учора журналістам польскі міністар Радаслаў Сікорскі, “для “Ўсходняга партнэрства” Польшча гатовая прапанаваць значную суму з нацыянальнага бюджэту”. Сікорскі выказаў спадзяваньне на тое, што “Ўсходняе партнэрства” таксама падтрымаюць і ЗША. Польскі міністар чарговым разам падкрэсьліў, што праграма не накіраваная супраць Расеі, якая можа ўзяць удзел у асобных праектах.

У сваю чаргу, цяперашні старшыня ЭЗ — Чэхія — спадзяецца, што Зьвяз зможа вылучыць дадатковыя сродкі на падтрымку фінансавых сыстэм краін Усходняй Эўропы. Да гэтай ідэі прыхільна ставяцца Аўстрыя, Нямеччына і некаторыя іншыя краіны, чые банкаўскія сыстэмы арыентаваныя на працу ва ўсходнеэўрапейскім рэгіёне.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG