У беларускім Міністэрстве замежных спраў паведамілі, што ніякага ўльтыматуму не атрымлівалі. Прэсавы сакратар МЗС Андрэй Папоў заявіў:
“Я ні пра якія ўльтыматумы ня чуў. Тое, пра што я чуў, — гэта тое, што адбыліся працоўныя перамовы паміж кіраўніцтвам Міністэрства замежных спраў Беларусі і Міністэрствам замежных спраў Польшчы, падчас якіх быў разгледжаны ўвесь комплекс двухбаковых дачыненьняў паміж нашымі краінамі. Ні пра якія ўльтыматумы ў нашым разуменьні гаворка падчас гэтай сустрэчы не ішла”.
На пытаньне, ці дадуць магчымасьць Саюзу палякаў правесьці зьезд, спадар Папоў адзначыў:
“МЗС не займаецца рэгуляваньнем пытаньняў нацыянальных мяншыняў у Беларусі”.
Прадстаўнік польскай амбасады ў Менску Павал Марчук таксама спаслаўся на тое, што інфармацыю пра польскі ўльтыматум адносна візыту Аляксандра Лукашэнкі на саміт у Прагу пакуль мае з мэдыяў:
“Не магу пацьвердзіць, бо я пакуль гэтую інфармацыю атрымаў з прэсы. У мяне няма афіцыйнай заявы нашага МЗС наконт гэтага”.
У амбасадзе таксама паведамілі, што сёньня ў Варшаве пройдуць перамовы паміж намесьнікамі міністраў замежных спраў Беларусі і Польшчы — Валерыем Варанецкім і Янам Баркоўскім.
Тым часам польскія мэдыі цытуюць намесьніка міністра польскага МЗС Яна Баркоўскага, які заявіў, што далейшае стаўленьне Менску да зьезду СПБ “будзе мець уплыў і на нашу пазыцыю ў дачыненьні да Беларусі на форуме Эўразьвязу”.
Паводле прадстаўніка не прызнаванага беларускімі ўладамі Саюзу палякаў Анджэя Пісальніка, польская дыпляматыя імкнулася цягам амаль чатырох гадоў улагодзіць канфлікт:
Саюз палякаў на чале з Анжалікай Борыс зьбіраецца правесьці свой сёмы зьезд 14—15 сакавіка ў Баранавічах. Зь вясны 2005 году беларускія ўлады не прызнаюць арганізацыю, таму галоўным пытаньнем зьезду будзе легалізацыя яе дзейнасьці.
