 |  |
У якім стане знаходзяцца цяпер дачыненьні паміж Менскам і Вашынгтонам? Чаму — у той час калі стасункі Беларусі з Эўразьвязам істотна паляпшаюцца — адносіны з ЗША застаюцца на мінімальным узроўні? На гэтыя пытаньні адказвае палітоляг Алесь Лагвінец.
Цыганкоў: “Пра што сьведчыць вельмі пазытыўная рэакцыя беларускага МЗС на крок Міністэрства фінансаў ЗША? Здаецца, санкцыі не адмененыя, толькі працягнута іхняе зьмякчэньне, — а рэакцыя афіцыйнага Менску даволі станоўчая.”
Лагвінец: “Мяркую, што размова ідзе пра працяг пэрыяду няпэўнасьці. Беларускім уладам даецца магчымасьць выправіць сытуацыю з правамі чалавека, каб канчаткова адмяніць тыя абмежаваньні, якія былі ўведзеныя ЗША.
Выглядае, што беларускія ўлады зьмянілі тактыку. Яны любы пазытыўны альбо нават нэўтральны бок з боку Захаду камэнтуюць падкрэсьлена станоўча. Але разам з тым самі сутнасна не мяняюць сваю палітыку”.
Цыганкоў: У дачыненьнях Менску з Эўразьвязам за апошнія месяцы былі зроблены некалькі рэальных крокаў – пачаліся афіцыйныя візыты эўрапейскіх чыноўнікаў у Менск. Але разам з тым адносіны з ЗША ня маюць ніякіх рэальных зьменаў – амэрыканская амбасада па-ранейшаму працуе ў скарочаным выглядзі, і няма ніякіх прыкметаў, што гэта хутка зьменіцца. Чаму?”
Лагвінец: “Думаю, беларускія ўлады разумеюць, што Беларусь не зьяўляецца прыярытэтам для новай амэрыканскай адміністрацыі. Яны лічаць, што могуць кампэнсаваць недахоп нармальных стасункаў з ЗША больш шырокімі і інтэнсіўнымі кантактамі з краінамі Эўразьвязу. Магчыма, Менск хоча даслаць сыгналь Вашынгтону – маўляў, глядзіце, Эўразьвяз гатовы весьці з намі дыялёг, моцна не патрабуючы кардынальных зьменаў унутры краіны”.
Цыганкоў: “То бок сытуацыю ў беларуска-амэрыканскіх дачыненьняў на сёньня я б сфармуляваў так: “ані міру, ані вайны”. І яны задавальняе афіцыйны Менск, а ЗША пакуль проста не даходзяць рукі да Беларусі”.
Лагвінец: Так. ЗША як сусьветная звышдзяржава відавочна маюць свае інтарэсы ў Беларусі. Але на сёньня гэта ня ёсьць першачарговай задачай альбо галоўным прыярытэтам для новай Адміністрацыі”
