Лінкі ўнівэрсальнага доступу

Гомель знаёмы й незнаёмы


Cёньня ў Гомелі ў межах грамадзкай кампаніі “Будзьма!” адбылася экскурсіія моладзі па гістарычных мясьцінах гораду.

Гаворыць удзельніца экскурсіі, студэнтка Даша, якая вывучае мастацтва беларускага дойлідзтва й марыць стаць архітэктарам:

“Гэта мой родны горад. Але я доўгі час жыла ня ў Гомелі. І шмат чаго ня ведаю. Я вучуся ў мастацкай школе, потым буду вучыцца на архітэктара. Таму цікава паглядзець на родны горад, яго архітэктуру. Напрыклад, пра “дамы-калодзежы”. Пра гэта я ну нічога ня ведала”.

У экскурсіі ўзялі ўдзел студэнты, старшаклясьнікі і іншыя зацікаўленыя.
Пра адметнасьці архітэктурнага аблічча Гомелю моладзі расказваў дасьледнік гісторыі архітэктуры Яўген Малікаў.



Уявіць сабе, што такое “дом-калодзеж”, экскурсанты змаглі, завітаўшы ў двор цяперашняй крамы “Дары прыроды”. У горадзе далёка ня ўсё захавалася. У прыватнасьці, кельлі манахаў 14-га стагодзьдзя, якія прырода адкрыла побач з Баярскім (цяпер Білецкім) спускам. Іх проста разбурылі й засыпалі.





Экскурсію па гораду зладзілі актывісты моладзёвага грамадзкага аб’яднаньня “Гісторыка”. Ягоны кіраўнік Зьміцер Рагачоў распавёў, што грамадзкае аб’яднаньне распачало праект знаёмства моладзі са сваімі роднымі мясьцінамі. Экскурсіі зладжаны ўжо на Віцебшчыне, ў Менску. Заплянаваны яны ў Берасьці ды іншых гарадах краіны:

“Мы намагаемся прыцягнуць увагу менавіта да сваіх родных мясьцінаў людзей, якія там жывуць. Гэтым праектам спрабуем перанесьці цэнтар цікаўнасьці ў абласныя гарады. Канешне, ёсьць турыстычныя фірмы са стандартнымі маршрутамі. Мы спрабуем шукаць нейкія альтэрнатыўныя тэмы, цікавыя маршруты. Цікавых людзей, якія могуць шмат чаго распавесьці”.
XS
SM
MD
LG