Лінкі ўнівэрсальнага доступу

Дзень роднай мовы ў Менску і Варшаве


Cтаршыня Таварыства беларускай школы Алесь Лозка уганараваны Таварыствам беларускай мовы як руплівец белаурушчыны

Cтаршыня Таварыства беларускай школы Алесь Лозка уганараваны Таварыствам беларускай мовы як руплівец белаурушчыны

21 лютага ў Міжнародны дзень роднай мовы пачаўся першы этап другой агульнанацыянальнай беларускай дыктоўкі.

У Менску дыктоўку пісалі ў сядзібе Таварыства беларускай мовы імя Францішка Скарыны. На выбар прапанаваны сёлета два тэксты — прадмова да зборніка “Дудка беларуская” Францішка Багушэвіча і “Родная мова” па Ўладзімеру Караткевічу. Сярод удзельнікаў былі амбасадары Швэцыі Стэфан Эрыксан і Ўкраіны Ігар Ліхавы.

Стэфан Эрыксан на беларускай дыктоўцы

Спадар Эрыксан адзначыў, што будзе рады, калі сваім удзелам у дыктоўцы падштурхне іншых да выкарыстаньня беларускай мовы, адметнай і прыгожай, на якой неабходна размаўляць.

Памяшканьне ТБМ маленькае, і ўсе 20 месцаў былі занятыя. Старшыня ТБМ Алег Трусаў задаволены стартам дыктоўкі:

“Мы ня ставілі на мэце сабраць усіх прыхільнікаў беларушчыны ў маленькі офіс ТБМ. Гэта проста сымбалічны пачатак. На 15 сакавіка — вялікая заля БНФ. Там можа ўзяць удзел да ста чалавек. Мы лічым, што дыктоўку павінны пісаць маленькімі групамі. Пісаць можна і дома, і ў сям’і, і на ўроках. Так было і ў мінулым годзе. Многія настаўнікі пісалі ў вёсках тэкст дыктоўкі на ўроках. Я думаю, што самае масавае напісаньне дыктоўкі адбудзецца 15 і 25 сакавіка. Чаму ў гэтым годзе раней? Бо 10-я ўгодкі Міжнароднага дня роднай мовы. У мінулым годзе мы пачыналі 15 сакавіка, на дзень першай канстытуцыі. Зараз мы гэты этап расьцягнулі на два месяцы”.

Біяграфію, фотаздымак і адрас пераможцаў дыктовак трэба дасылаць у ТБМ для адмысловай публікацыі ў газэце “Наша слова”, а таксама ўганараваньня. Сёлета ў многіх рэгіёнах улады выдзелілі памяшканьні для правядзеньня дыктоўкі. Аднак вышэйшыя дзяржаўныя структуры прайгнаравалі запрашэньне ТБМ на ўдзел у акцыі. Алег Трусаў адзначыў:

“Мэта дыктоўкі тая ж, як і ў мінулым годзе — спрыяць папулярнасьці, прэстыжнасьці беларускай мовы. Паказаць, што мова жывая. Ну а сёлета, напярэдадні перапісу, тым больш дыктоўка павінна заняць важнае месца. Бо той чалавек, які пісаў дыктоўку, ужо не напіша, што яго мова іншая, не беларуская”.

Сёньня дыктоўку пісалі і ў іншых гарадах. У Варшаве гэтая імпрэза адбылася ў палацы культуры і навукі. Прадстаўнік ініцыятывы “Беларуская нацыянальная памяць” Анатоль Міхнавец апавёў:

“Беларусы, якія жывуць, вучацца ці знаходзяцца тут на прытулку, пісалі дыктоўку ў цэнтры Варшавы. Мы пісалі тэкст «Родная мова» па Караткевічу. Прыйшло каля 50-ці чалавек, прыйшлі нашы сябры палякі, былы амбасадар Польшчы ў Беларусі Марыюш Машкевіч разам з жонкай, прафэсары Варшаўскага ўнівэрсытэту. Прэзыдэнт Collegium Civitas пані Каралевіч прыйшла прывітаць беларусаў.

Калі мы хочам быць нацыяй, дзяржавай, мы павінны размаўляць на сваёй мове. Мова гэта тое, што гуртуе людзей. Калі мы ня будзем яе памятаць і паважаць, то нас ніхто ня будзе памятаць і паважаць”.

Сёньня ж у менскім Палацы мастацтваў адбылася імпрэза з нагоды Міжнароднага дня роднай мовы.

Алена Анісім, Людміла Дзіцэвіч і Алег Трусаў на імпрэзе ў Палацы мастацтваў

На ёй былі ўганараваныя рупліўцы беларушчыны. Сярод іх старшыня Таварыства беларускай школы Алесь Лозка. Ён нагадаў, што 12 гадоў таму на Меншчыне ў першыя беларускія клясы прымалася каля 80% дзяцей. А цяпер — 16-17%.

“Асабліва ў апошні час гэта статыстыка вельмі падае. Калі прыблізна 1% штогод было падзеньне, то цяпер 2,5%. Адчуваецца, што ў наступным годзе будзе яшчэ горш у сувязі з рэформай. Таму нам усім трэба добра працаваць. Ня толькі дзень роднай мовы — трэба намагацца, каб у наступным годзе быў год роднай мовы”.

ТБМ таксама адзначыла падзякамі амбасаду ЗША, амбасадараў Швэцыі, Украіны, Літвы, Польшчы, былых амбасадараў Ізраілю Зэева бен Ар’е і Славакіі Любаміра Рэгака за міжнародны распаўсюд беларускай мовы.

Паказаць камэнтары

XS
SM
MD
LG