Лінкі ўнівэрсальнага доступу

logo-print

На Лідзкай абутковай фабрыцы рыхтуюцца да пераходу на чатырохдзённы працоўны тыдзень. Асабліва адчувальна крызіс закрануў абутковае прадпрыемства пасьля дэвальвацыі беларускага рубля.



Загадчыца плянавага аддзелу Алена Дайліда распавядае, што найперш банкі паднялі працэнтную стаўку па крэдытах з 14 да 21%. Прычым нават па тых, якія былі ўзятыя яшчэ да Новага году. Зь яе слоў, выплата па крэдытах за год павялічылася на 600 мільёнаў рублёў.

Адначасова падрасьлі кошты імпартнай сыравіны — на 18—20%, а таксама энэрганосьбітаў.

Дайліда: “Гэта, натуральна, прывяло да падвышэньня выдаткаў, сабекошту, зьнізілася рэнтабэльнасьць, і прыбытку мы атрымаем значна меней”.

Яшчэ адна важная акалічнасьць, якую падкрэсьлівае загадчыца плянавага аддзелу, — празьмерная бюракратыя. Стала складаней праводзіць разьлікі за імпартную сыравіну ў валюце: паводле спадарыні Дайліды, трэба спачатку адаслаць паперкі ў вышэйстаячыя арганізацыі й чакаць дазволу.

Але й на гэтым праблемы не сканчаюцца.
кошты на айчынную сыравіну большыя за імпартныя ...

Дайліда: “А яшчэ ўказ прэзыдэнта, каб мы максымальна куплялі сыравіну айчынных вытворцаў. Але кошты ў іх ня меншыя, а нават большыя, чым імпартныя”.

Прэзыдэнт патрабуе, каб на месцах усе рабіліся міністрамі гандлю, але, са слоў спадарыні Дайліды, гэта ўдаецца ня надта: цэны на прадукцыю зьнізіць не атрымліваецца, дый пакупная здольнасьць паўсюль зьнізілася.

Дайліда: “Мы наагул закрэдытаваныя й уласных сродкаў у нас няма. А яшчэ ў такіх умовах, якія зараз існуюць, для нас — гібель. Як захаваць калектыў, як тлумачыць людзям, што нас закрануў крызіс? Ніхто ня хоча пра гэта думаць, а мы павінны жыць, зарабляць...”
такія умовы, якія зараз існуюць, для нас — гібель...

Загадчыца вытворчасьці прадпрыемства Тамара Ігнатовіч таксама скардзіцца на тое, што цяжка працаваць у сёньняшніх умовах.

Ігнатовіч: “Пакуль у нас 5-дзёнка, але пытаньне 4-дзёнкі ўжо вісіць у паветры. У пэрспэктыве ўжо разьлічваюцца пляны з эканамічным эфэктам, выдаткамі, да гэтага падрыхтоўка ідзе й гэтае пытаньне разглядаецца”.

На лідзкай абутковай фабрыцы працуе каля адной тысячы рабочых. Тут выпускаюць абутак са скураным і тканінным верхам.

Паказаць камэнтары

XS
SM
MD
LG