У мінулым годзе, пасьля вайны з Грузіяй, кіраўнік Расеі Дзьмітрый Мядзьведзеў прапанаваў стварыць у рамках АДКБ уласныя ўзброеныя сілы – калектыўныя сілы апэратыўнага рэагаваньня.
Мяркуецца, што ў іх склад увойдуць мабільныя злучэньні, вайсковыя часткі і падразьдзяленьні сямі краін. Плянуецца, што большую іх частку выдзеліць Расея (паветрана-дэсантную дывізію і дэсантна-штурмавую брыгаду) і Казахстан (дэсантна-штурмавую брыгаду). Астатнія сябры АДКБ абмяжуюцца батальёнам.
У мірны час гэтыя вайсковыя кантынгенты будуць знаходзіцца ў месцах сталай дыслякацыі і падпарадкоўвацца нацыянальным вайсковым структурам. Аб’яднаны штаб АДКБ будзе каарыднаваць іх дзейнасьць. У крызіснай сытуацыі рашэньне аб дзейнасьці войскаў прыме савет калектыўнай бясьпекі АДКБ.
У сьнежні на нефармальнай сустрэчы кіраўнікі Расеі, Казахстана, Армэніі, Кыргызстана і Таджыкістана ўхвалілі гэтую ідэю. Тады праігнаравалі гэтую сустрэчу кіраўнікі Беларусі і Ўзбэкістану.
Паводле расейскіх мэдыяў, падчас учорашняй сустрэчы Аляксандар Лукашэнка пагадзіўся на ўдзел Беларусі ў гэтым вайсковым аб’яднаньні. Аднак сёньня ўдзельнікі АДКБ зьбіраюцца абмеркаваць прыймальную формулу, каб стварэньне калектыўных сіл не супярэчыла канстытуцыям краінаў, якая забараняе ўдзел у вайсковых блёках.
