Прэм’ер супрацьпаставіў расейскія падыходы – беларускім. Спадар Пуцін, праўда, не ўжываў слова “Беларусь”. Але зь ягонай цытаты выразна выцякае, каго ён меў на ўвазе:
“Мы ж не зрабілі тое ж сама, як у некаторых краінах зрабілі. Мы не "грохнулі" нацыянальную валюту зь сёньня на заўтра. Мы ўсё гэта рабілі плаўна і акуратна. Асэнсавана пайшлі на тое, каб траціць золатавалютныя рэзэрвы, даць магчымасьць удзельнікам эканамічнай дзейнасьці, уключаючы і грамадзянаў, асэнсаваць працэсы, якія адбываюцца,і прыняць адпаведныя рашэньні: каму куды ісьці, у якую валюту, у рублях застацца, пайсьці ў даляры, у эўра, яшчэ штосьці зрабіць, пайсьці ў нерухомасьць і так далей”.
Былы старшыня праўленьня Нацыянальнага банку прафэсар Станіслаў Багданкевіч кажа, што ён цалкам падзяляе выказваньне Ўладзімера Пуціна:
“Я лічу, што мы мусілі арыентавацца на попыт і прапанову валюты. І калі попыт узрос і патрэбна было траціць рэзэрвы, то быў самы зручны момант для павольнай, плаўнай дэвальвацыі нацыянальнай валюты. Ніякага шоку не было б, і гэта выглядала б нармальным.
Мы ж нават у студзені яшчэ патрацілі 100 мільёнаў даляраў з рэзэрвовага фонду на падтрымку курса. То бок ён і цяпер яшчэ працягвае падаць”.