Лінкі ўнівэрсальнага доступу

Ці скароціцца сьпіс “невыязных”?


Анатоль Лябедзька трымае пашпарт, на якім стаіць пячатка “У выездзе адмоўлена”

Анатоль Лябедзька трымае пашпарт, на якім стаіць пячатка “У выездзе адмоўлена”

Камісія па правах чалавека, нацыянальных адносінах і СМІ абмяркоўвала праект закону аб перамяшчэньнях грамадзянаў Беларусі за мяжу і на тэрыторыю краіны.


Прадстаўнікі апазыцыі, якія трапілі ў “чорны сьпіс” асобаў, якім забаронены выезд за тэрыторыю Беларусі, лічаць, што дзеяньні ўладаў груба парушаюць дзейнае заканадаўства і служаць рычагом ціску на дзеячаў дэмакратычнай супольнасьці.

Вялікая частка законапраекту прысьвечаная пытаньням выезду непаўналетніх грамадзянаў Беларусі. Плянуецца, што яны змогуць выяжджаць зь Беларусі ў суправаджэньні аднаго з законных прадстаўнікоў бяз згоды другога. У выпадку, калі адзін з законных прадстаўнікоў ня згодзен, ён мае права зьвярнуцца ў суд з заявай аб вызначэньні іншага парадку выезду. Гэта ня тычыцца тых выпадкаў, калі непаўналетні выяжджае для лячэньня і аздараўленьня. На падставе рашэньня суду аб вызначэньні парадку, адрознага ад агульнага правіла, зьвесткі пра дзіця і вызначаны судом парадак яго выезду ўключаюцца ў банк зьвестак пра грамадзян, чыё права на выезд часова абмежаванае.

Дэпутаты адмовіліся паведаміць “Свабодзе” вынікі паседжаньня, якое адбывалася пад старшыняваньнем Яўгена Мельнікава:

“Ён сказаў, што яго сёньня ня будзе. Ён будзе заўтра”.

Паводле новага закону, грамадзяніну, якому часова не дазваляюць перасякаць мяжу, будзе дазволены выезд, калі ён мае патрэбу ў тэрміновым лячэньні, або мусіць удзельнічаць у крымінальным працэсе, або едзе на пахаваньне сваяка.

Цягам году некаторыя апазыцыянэры сутыкаліся зь перашкодамі на беларускай мяжы, калі спрабавалі выехаць у замежжа.

Раней старшыня беларускага КДБ Юры Жадобін на прэсавай канфэрэнцыі заяўляў, што ў краіне ёсьць 1867 дэструктыўных элемэнтаў і спэцслужбы іх добра ведаюць.

Прозьвішчы актывістаў моладзевага дэмакратычнага руху ўнесены ў так званы “чорны сьпіс”, які, акрамя КДБ і МУС, падае й Міністэрства абароны, тлумачачы гэта тым, што юнакі дасягнулі прызыўнога ўзросту. Пры гэтым крымінальных спраў за ўхіленьне ад службы ў войску супраць хлопцаў няма.

Пасьля выбуху бомбы падчас сьвяточнага канцэрту 4 ліпеня сьледчыя дапыталі дзясяткі тысяч грамадзянаў. Шмат хто зь іх пасьля гэтага трапіў у “сьпіс невыязных”. Апынуліся там і прозьвішчы лідэраў усіх незарэгістраваных моладзевых арганізацый. На ўсе запыты яны атрымліваюць адказ, што тэрыторыю Беларусі ім пакідаць “немэтазгодна”, і спасылку на крымінальную справу, нягледзячы на тое, што яны ня маюць статусу падазраваных.

Многія студэнты, якія вучацца ў літоўскіх ВНУ, пазбаўленыя магчымасьці трапіць на сэсію з-за штампу ў пашпарце “У выезьдзе за мяжу адмоўлена”. Сярод іх лідэр “Маладога фронту” Зьміцер Дашкевіч:

Зьміцер Дашкевіч і Анатоль Лябедзька ў часе "марша невыязных"
“Зьвяртаўся ў розныя дзяржаўныя інстытуты з просьбай патлумачыць мне прычыну маёй “невыязносьці”, удзельнічаў у розных акцыях пратэсту ў сувязі з тым, што ў Беларусі ёсьць палітневыязныя. У апошнім адказе, які мне даслала рэспубліканская пракуратура, напісана, што быццам бы я выязны і быў выязны ўвесь час.

Бліжэйшым часам я паспрабую гэта праверыць. Я вучуся ў Віленскім пэдагагічным унівэрсытэце і, калі летась вызваліўся са Шклоўскай калёніі, паспрабаваў паехаць на вучобу, каб працягнуць сваё навучаньне. Тады мне паставілі на беларуска-літоўскай мяжы штамп у пашпарт”.

6 лістапада і 10 сьнежня летась лідэр АГП Анатоль Лябедзька ўдзельнічаў у вулічных акцыях пратэсту разам зь лідэрам “Правага альянсу” Юрасём Карэтнікавым, актывістамі “Маладога фронту” Паўлам Кур’яновічам і Настай Палажанкай. З шыльдамі на грудзях “Я палітневыязны” яны наведалі МУС, Генэральную пракуратуру і адміністрацыю Аляксандра Лукашэнкі.

Гаворыць Анатоль Лябедзька:

“Ня маю вялікага аптымізму, што прызначаныя дэпутаты прымуць такое заканадаўства, якое зьліквідуе інстытут палітневыязных зь Беларусі. Я вымушаны літаральна на гэтым тыдні праводзіць нейкія публічныя акцыі дзеля таго, каб прыцягнуць увагу грамадзкасьці, у тым ліку й уладаў, што ў краіне існуе прыгоннае права, як некалькі стагодзьдзяў таму, калі людзі былі прывязаныя да нейкай мясцовасьці. Так і на сёньняшні дзень. Гэта пытаньне не прававое. Яно палітычнае”.

Анатоль Лябедзька атрымлівае адказы на свае шматлікія звароты. Пакуль яму пішуць, што пытаньне разглядаецца.
XS
SM
MD
LG