Лінкі ўнівэрсальнага доступу

Дэвальвацыя беларускага рубля, якая адбылася ў першыя дні новага году, прыкметна адбілася на гандлёвым абароце ў крамах і на рынках Гарадзеншчыны. Людзі спяшаюцца пазбавіцца ад абясцэненых рублёў.


У Горадні гандлёвы бум адчуваўся як у крамах, так і на рынках. Намесьніца дарэктара гандлёвага дому “Нёман” Натальля Дадаян:

“Нягледзячы на тое, што былі выходныя дні, гандаль вёўся вельмі актыўна: добра прадавалася бытавая тэхніка, радыёапаратура, ды ўсё... і тавары лёгкай прамысловасьці, адзеньне. Вельмі актыўны гандаль, нягледзячы на сьвяточныя дні”.

У Лідзе прадавец крамы “Гарызонт”, дзе можна набыць бытавую тэхніку й апаратуру, ахарактарызаваў гэтыя дні як ажыятажныя:

“Куплялася ўсё: тэлевізары, лядоўні, пралькі, кухонныя камбайны, мясарубкі, усё-ўсё. Гэта выклікала ажыятаж у насельніцтва. Мы далі палову месячнага гандлёвага абароту за тры дні”.

Прадавачка крамы “Гарызонт” з Наваградку на пытаньне — ці вырас попыт на тавары ў іх краме на пачатку году.

Спадарыня: “Пакуль не”.

Карэспандэнт: “А ў выходныя шмат людзей наведвалася ў краму?”

Спадарыня: “Ды не, ня шмат, як звычайна”.

У Слоніме спадар, які гандлюе бытавой тэхнікай на рынку, таксама ўсплёску гандлю не заўважыў.

Спадар: “Людзі толькі ўсе крычаць, што даляр падняўся. А які можа быць ажыятаж, калі ў людзей грошай няма?”

У мэблевай краме ў Горадні загадчыца задаволена кажа, што продажы павялічыліся.

Спадарыня: “Досыць нашмат, адсоткаў на 70”.

Карэспандэнт: “А што найлепей прадаецца?”

Спадарыня: “У асноўным мяккая мэбля, тое, што дарагое, у што можна ўкласьці грошы й што яшчэ засталося па старых коштах”.

Карэспандэнт: “А новыя цэны хутка зьявяцца?”

Спадарыня: “У асноўным на ўсю прадукцыю ўжо ёсьць”.

Карэспандэнт: “І нашмат яны вырасьлі?”

Спадарыня: “У асноўным на 20%”.

Паказаць камэнтары

XS
SM
MD
LG