Лінкі ўнівэрсальнага доступу

Агляд тэлефанаваньняў за пятніцу 26 сьнежня.


Для будаўніцтва беларускай АЭС абраная астравецкая пляцоўка. Яна знаходзіцца на літоўскім памежжы, за 30 км ад возера Нарач. Генэральным падрадчыкам стане расейскае прадпрыемства “Росатом”.

Спадар: “Для пачатку будаўніцтва АЭС трэба спытаць згоды ўсяго насельніцтва Беларусі. Рэфэрэндум. Бо падобныя падарункі ад роднага ўраду мы маем. Чарнобыль, усеагульная мэліярацыя, жывёлагадоўчыя комплексы і інш.”

У часе нядаўняга візыту Аляксандра Лукашэнкі ў Маскву беларускі бок папрасіў чарговы крэдыт на 100 мільярдаў расейскіх рублёў. Мы працягваем атрымліваць тэлефанаваньні на гэтую тэму.

Спадар: “Бярэ Лукашэнка крэдыты ў Расеі, і хай бярэ. Ён хітры, як старшыня калгаса, і разумны, як камсамольскі прапагандыст. Яшчэ на пачатку сваёй дзейнасьці ён прапанаваў паставіць Беларусь у адносінах з Расеяй, як Ізраіль і ЗША. Расея даруе нам тры мільярды. А калі сур'ёзна, статыстыкі павінны ўключыць у свае паказчыкі запазычанасьць краіны і запазычанасьць на аднаго жыхара”.

Спадар, Барысаў: “З далёкіх часоў ніколі не было такіх мараў. Па дадзеных Белстата, даўгі беларусаў 14,5 мільярдаў даляраў. І яшчэ просім. І гэтыя даўгі цяжка носім. Былы старшыня Нацбанку Станіслаў Багданкевіч кажа: “ВВП на 10 адсоткаў расьце, а даўгі на сорак. Калі не прыняць мераў, мыльная бурбалка стане вялікіх памераў. Даўгі растуць і растуць, бурбалка абавязкова можа лопнуць. Перад Новым годам не хачу пужаць, але пра гэта трэба казаць”.

Спадарыня: “Мая вельмі блізкая знаёмая неяк сказала: “Мая маці так шмат гаворыць і так мала робіць, як наш прэзыдэнт”.

17 сьнежня ў Варшаве прайшоў канцэрт “Зь любоўю зь Беларусі”. 26-га тэлевэрсію імпрэзы паказаў канат ОНТ. Водгукі на гэтую падзею:

Ільля Копыл: “Толькі што скончыўся канцэрт беларускай эстрады ў Варшаве. Як прыемна было слухаць! Амаль усе песьні прагучалі на роднай беларускай мове, некалькі на польскай. Як высьветлілася, і амбасадар Беларусі ў Польшчы спадар Латушка дасканала ведае родную мову і вельмі прыгожа размаўляе на ёй без усялякіх паперак. Незразумела, чаму ж гэтыя самыя артысты, сьпевакі ў сябе на Радзіме сьпяваюць на чужой расейскай мове. Калі б яны сьпявалі беларускія песьні на беларускай мове, іх папулярнасьць значна вырасла б як на радзіме, так і за мяжой. Вядоўца Люся Лушчык таксама карысталася роднай мовай. А вось у сябе на радзіме 24 сьнежня раніцай у тэлеперадачы яна размаўляла з каталіцкім сьвятаром. Люся задавала пытаньні на расейскай мове, але сьвятар адказваў толькі на беларускай мове”.

Сёньня мы таксама атрымалі такое тэлефанаваньне:

Спадар Зіноўеў: “Думаю, што Ірына Казуліна прымусіла выпусьціць палітвязьняў. І чалавек году — яна. Хачу павіншаваць з Калядамі рэдакцыю і падзякаваць за цікавыя перадачы”.

Шаноўныя слухачы! Нагадаем: тэлефон “Свабоды” ў Менску — 266-39-52, працуе 24 гадзіны на суткі. Нумар мабільнай сувязі для смс-паведамленьняў: 375.293.912.224. Тэлефануйце і пішыце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё Свабода.

XS
SM
MD
LG