Лінкі ўнівэрсальнага доступу

Прадпрымальнікі праз суд дамагаюцца рэфэрэндуму


Жыхар магілёўскага мікрараёну “Саломінка”, былы кандыдат на дэпутацтва ў палаце прадстаўнікоў Ігар Каваленка паскардзіўся ў Ленінскі суд абласнога цэнтру на гарвыканкам. Скаржнік цьвердзіць, што выступае ад імя гандляроў рынку “Крыніца”.

Тыдзень таму гарвыканкам адмовіўся рэгістраваць ініцыятыўную групу па правядзеньні мясцовага рэфэрэндуму. Гэта й стала падставай для скаргі ў суд. Ігар Каваленка быў старшынём той групы.

Праз рэфэрэндум гандляры хацелі высьветліць, ці падтрымліваюць жыхары мікрараёну “Саломінка” намер улады перанесьці рынак “Крыніца” ў іншае месца, а замест яго збудаваць спарткомплекс. Акрамя таго жыхары “Саломінкі” меліся вызначыцца, што ім больш патрэбна: школа й дзіцячы садок — альбо спарткомплекс.

Адмову ў рэгістрацыі ініцыятыўнай групы гарвыканкам патлумачыў тым, што ў інтарэсах грамадзян ужо нібыта прынятыя рашэньні пра будоўлю ў мікрараёне школы, дзіцячага садка й спарткомплексу.

Ігар Каваленка заяўляе, што гарвыканкам, не зарэгістраваўшы ініцыятыўнай групы, парушыў канстытуцыйныя правы жыхароў “Саломінкі”. Праз суд ён намагаецца адмяніць пастанову гарвыканкаму і абавязаць яго зарэгістраваць ініцыятыўную групу арганізатараў рэфэрэндуму.

Прадпрымальнікаў улады абавязалі перанесьці свае павільёны на новае месца да канца гэтага году. На рынку гандлююць паўтары сотні гандляроў. Павільёнаў тут каля паўсотні.

Паказаць камэнтары

XS
SM
MD
LG