Лінкі ўнівэрсальнага доступу

У Смаргоні абрынулася прыбудова да школы


У Смаргоні абрынулася двухпавярховая прыбудова да будынку сярэдняй школы № 2. Як паведаміў БелаПАН прэс-сакратар Міністэрства па надзвычайных сытуацыях Віталь Навіцкі, абрушэньне здарылася 18 сьнежня ў 21:20 на плошчы 190 квадратных мэтраў.

В. Навіцкі падкрэсьліў, што пацярпелых у выніку інцыдэнту няма. “Спэцыялісты-кінолягі абсьледавалі месца абрушэньня. Іх вэрдыкт: людзей пад разбуранай канструкцыяй няма”, — сказаў прэс-сакратар.

9 сьнежня ўпраўленьне адукацыі Смаргонскага райвыканкама з-за шчылін у сьценах забараніла эксплюатацыю прыбудовы й знаходжаньне там людзей. “Апрача таго, былі прынятыя меры па абмежаваньні доступу ў памяшканьне і на тэрыторыю”, — падкрэсьліў ён.

У МНС лічаць, што прычынай абрушэньня стала “страта нясучай здольнасьці падмурка капітальнай сьцяны прыбудовы да школы”. Будынак школы быў узьведзены ў 60-я гады, расказаў прэс-сакратар.

Цяпер працягваюцца работы па разборцы завалаў. На месцы задзейнічаныя 44 чалавекі і 15 адзінак тэхнікі. Працуюць кіналягічная, інжынэрная і іншыя службы МНС, зазначыў В. Навіцкі.






Старшыня Гарадзенскага аблвыканкаму Ўладзімер Саўчанка (першы зьлева),старшыня Смаргонскага выканкаму Мечыслаў Гой (трэці зьлева) на месцы здарэньня.


Фота Ўладзімера Шульжыцкага

Паказаць камэнтары

XS
SM
MD
LG