Лінкі ўнівэрсальнага доступу

Сёньня Міністэрства юстыцыі Беларусі перадало афіцыйнае пасьведчаньне аб рэгістрацыі “Руху “За свабоду” яго заяўнікам.


Пра гэта “Свабодзе” паведаміў намесьнік старшыні руху Юрась Губарэвіч. Ён адзначыў, што рух зарэгістравалі толькі з чацьвёртай спробы.

Першы свой устаноўчы сход рух правёў яшчэ ў траўні 2007 году. Апошняе, чацьвёртае па ліку, рашэньне аб стварэньні грамадзкай арганізацыі было прынятае 23 кастрычніка сёлета ў Магілёве на ўстаноўчай канфэрэнцыі пры ўдзеле больш як 70 чалавек з розных рэгіёнаў Беларусі. Канфэрэнцыя зацьвердзіла статут і сфармавала кіроўчыя органы аб’яднаньня. Старшынём абраны Аляксандар Мілінкевіч. Яго намесьнікамі сталі Віктар Карняенка і Юрась Губарэвіч.

У інтэрвію “Свабодзе” Юрась Губарэвіч адзначыў:

Юрась Губарэвіч
“Атрымалася зарэгістравацца толькі з чацьвёртай спробы. Але, на маю думку, нічога дзіўнага ў самім факце рэгістрацыі няма. Таму што зь юрыдычнага пункту гледжаньня тыя дакумэнты, якія мы падалі на рэгістрацыю, былі бездакорныя.

На нашу думку, такая ж сытуацыя была і ў тры мінулыя разы. Але сёньняшняя рэгістрацыя сьведчыць пра пэўныя зьмены ў стаўленьні рэжыму да грамадзянскай супольнасьці ў Беларусі.

Вельмі б хацелася, каб факт рэгістрацыі “Руху “За свабоду” ня стаў выключэньнем з агульных правілаў нерэгістрацыі. І каб рэгістрацыю атрымалі ў найбліжэйшы час незалежныя і дэмакратычныя арганізацыі, якія правялі свае ўстаноўчыя сходы і падалі адпаведныя дакумэнты ў Міністэрства юстыцыі".

Паказаць камэнтары

XS
SM
MD
LG