Лінкі ўнівэрсальнага доступу

У Наваградку паставяць помнік Міндоўгу


У наступным годзе ў гістарычным цэнтры Наваградку плянуюць паставіць конны помнік заснавальніку і першаму вялікаму князю Вялікага княства Літоўскага Міндоўгу (1195? — 1263), паведаміў БелаПАН галоўны спэцыяліст аддзелу культуры Наваградзкага райвыканкаму Вячаслаў Лаўрашчук.

У 2009 годзе будзе адзначацца 1000-годзьдзе першага ўзгадваньня Літвы ў летапісах і 965-годзьдзе Наваградку — першай сталіцы ВКЛ. Над праектам коннай статуі працуе менскі скульптар Генадзь Буралкін. Ён прапануе адліць з бронзы Міндоўга зь мячом на кані і ўстанавіць гэтую кампазіцыю на каменным пастамэнце.

“Разам з тым дакладнае месца ўзьвядзеньня помніка пакуль ня вызначана, як і дата яго адкрыцьця”, — сказаў сп. Лаўрашчук. Паводле яго слоў, ураджэнец Наваградку Павал Касьцюкевіч стварыў у Маскве Нацыянальны інвэстыцыйны фонд Беларусі (“Наваградак”) для збору сродкаў і аказаньня фінансавай дапамогі ў рэалізацыі гэтага ды іншых праектаў, накіраваных на аднаўленьне гісторыка-культурнай спадчыны гораду й ушанаваньне памяці дзеячаў айчыннай гісторыі, навукі і культуры, чыё жыцьцё зьвязана з Наваградкам.

“Кіраўніцтва горада падтрымлівае праект ўзьвядзеньня помніка”, — зазначыў Вячаслаў Лаўрашчук.

Паказаць камэнтары

XS
SM
MD
LG