Лінкі ўнівэрсальнага доступу

“200 беларускіх дзяцей маюць прыехаць на Каляды ў Ірляндыю”


Эўрапрлямэнтар з Ірляндыі Ліэм Эйлвард заклікаў міністра замежных спраў сваёй краіны Мішэля Марціна і амбасадара Беларусі ў ЭЗ Уладзімера Сянько падпісаць двухбаковае ўрадавае пагадненьне.

Гэтае пагадненьне павінна дазволіць 200 чарнобыльскім дзецям прыехаць у Ірляндыю на найбліжэйшыя Каляды. Паводле ірляндзкага палітыка, беларускі ўрад пасьля выпадкаў у Італіі, ЗША і Бэльгіі, калі беларускія дзеці адмаўляліся ехаць дадому, настойвае на заключэньні адпаведных пагадненьняў з урадамі заходніх краін. Гэты дакумэнт мог бы гарантаваць беларускаму боку вяртаньне дзяцей. “Мы павінны заключыць пагадненьне найхутчэй, каб беларускія дзеці змаглі правесьці ў Ірляндыі калядныя канікулы”, – заявіў Ліэм Эйлвард.

Паводле ягоных словаў, краіну штогод наведвае прыкладна 2,5 тысячы беларускіх дзяцей, а таму ірляндзкі бок павінен гарантаваць, “што робіць усё ад яго залежнае каб двухбакове пагадненьне было дасягнутае”

“Урад Ірляндыі плянуе выдаткаваць 600 000€ на міжнародныя чарнобыльскія праграмы 2009-2011, – адзначае ў сваім лісьце Ліэм Эйлвард. – Урад правёў вялікую і складаную працу, каб заключыць пагадненьне зь беларускім урадам па гэтым пытаньні”.
XS
SM
MD
LG