Лінкі ўнівэрсальнага доступу

Беларус супраць “Бульбаша”


Жыхар Віцебску Сяргей Каваленка патрабуе, каб вытворцаў настойкі “Бульбашъ” прыцягнулі да крымінальнай адказнасьці за абразу годнасьці беларускай нацыі.


Віцебскі сябар КХП БНФ спадар Каваленка лічыць, што “бульбаш” — гэта зьневажальная для беларуса мянушка. Таму ён зьвярнуўся ў пракуратуру Першамайскага раёну Віцебску, каб вытворцу вядомага брэнду — менскі “Завод вінаградных вінаў «Дыяніс»” — прыцягнулі да крымінальнай адказнасьці за распальваньне міжнацыянальнай варожасьці.

У прыватнасьці, у ягонай заяве на імя пракурора гаворыцца: “На мой погляд, слова «Бульбашъ» падрывае павагу да беларусаў, выклікае непрыняцьце беларускай культуры, нацыянальнага ладу жыцьця беларусаў, гаворыць аб непаўнавартаснасьці, абмежаванасьці беларусаў. Да таго ж слова «Бульбашъ» не зьяўляецца літаратурным і здаўна лічыцца зьневажальнай мянушкай беларуса”.

Паводле спадара Каваленкі, наўрад ці можна чакаць, каб ва Ўкраіне пачалі выпускаць нейкі напой пад назвай “Хахол”, або ў Расеі — пад назвай “Маскаль”.

На ягоную думку, завод “Дыяніс” мусіць адмовіцца ад выкарыстаньня назвы “Бульбашъ”. З гэтай прапановай ён зьвярнуўся да адміністрацыі прадпрыемства і днямі атрымаў адказ. У расейскамоўным лісьце за подпісам дырэктара прадпрыемства М. Лявончыка гаворыцца: “…пра наданьне слову «Бульбашъ» таго сэнсу, які вы прапагандуеце, нам нічога не вядома. Наданьне вамі гэтаму слову адмоўнай нацыянальнай афарбоўкі скіраванае на распальваньне варожасьці, прыніжэньне нацыянальнага гонару і годнасьці, таму хацелі б вас засьцерагчы ад такога памылковага і небясьпечнага шляху”.

Свой зварот у пракуратуру Сяргей Каваленка тлумачыць тым, што паразуменьня з адміністрацыяй заводу “Дыяніс” не атрымалася. Сваё меркаваньне, што выкарыстоўваць назву “Бульбашъ” недапушчальна, ён зьбіраецца адстойваць далей.

Паказаць камэнтары

XS
SM
MD
LG