Лінкі ўнівэрсальнага доступу

Сёньня 16-гадовая Тацяна Казыра павінна даць канчатковы адказ сваім прыёмным амэрыканскім бацькам, ці вернецца яна ў Беларусь.


Дзевяць гадоў запар дзяўчына на летнія вакацыі прыяжджала ў сям’ю Мануэля і Дэборы Запатаў ў амэрыканскі горад Пэталуму. Сёлета яна вырашыла застацца ў Амэрыцы. А некалькі дзён таму ўразіла прыёмных бацькоў навіной, што вырашыла вярнуцца на радзіму.

Гісторыя 17-гадовай Тані Казыры, якая ў жніўні адмовілася вяртацца ў Беларусь са Злучаных Штатаў Амэрыкі, выклікала вялікі рэзананс. Зь дзяўчынай вялі перамовы беларускія дыпляматы, прасілі вярнуцца. Прыёмныя бацькі нанялі адвакатаў, каб тыя абаранялі інтарэсы Тацяны. З-за гэтай гісторыі ўскладнілася працэдура выезду на аздараўленьне іншых дзяцей, зьявіўся ўказ прэзыдэнта, згодна зь якім накіроўваць дзяцей на аздараўленьне можна толькі ў тыя краіны, зь якімі Беларусь заключыла адпаведныя пагадненьні. І вось нечакана для ўсіх Тацяна заявіла, што хоча вярнуцца. Прыёмныя бацькі далі ёй тыдзень на роздум, каб прыняць канчатковае рашэньне, і ў сераду гэты тэрмін сканчаецца.

Таніна бабуля Надзея Пятроўна Новік, якая гадавала Таню, сёньня паведаміла Радыё Свабода, што пакуль ніякіх навінаў ад унучкі няма. У аўторак увечары Надзея Пятроўна не магла датэлефанавацца да Тацяны:

“Нічога ня ведаю, нічога новага пакуль сказаць не магу. Звычайна і яна тэлефануе, і я ёй званю, але ўчора ці то на лініі праблемы, ці то занята пастаянна. Учора я так і не датэлефанавалася. Сёньня ўвечары буду спрабаваць званіць, можа, зьвяжуся...”

Надзея Пятроўна кажа, што Таня мела сур’ёзны намер вярнуцца. Дзяўчынка вельмі сумуе ў Амэрыцы, таму бабуля падтрымлівае ўнучку:

“Так, ухваляю яе рашэньне. Калі яна хоча дадому, як жа я магу не ўхваляць? Калі яна вырашыла застацца, я яе падтрымала. Зараз вырашыла дахаты ехаць — я таксама падтрымліваю”.

Віза ў дзяўчыны скончыцца 26 сьнежня, але яна вырашыла не чакаць гэтага дня і вярнуцца раней. У Амэрыцы Таня займалася з рэпэтытарамі. Бабуля кажа, што Таня вернецца ў школу, будзе даганяць. З ангельскай мовай праблем няма, яе дзяўчына ведае дасканала, таму ў школе вывучае нямецкую.

“Канечне, цяжка ёй там. Спачатку яна загарэлася застацца, а цяпер цяжка ёй там, яна сумуе вельмі. Хаця прыёмная сям’я яе вельмі любіць, да яе добра ставяцца, яна сумуе па ўсіх нас. Сяброў і сябровак у яе вельмі шмат. Таму засумавала і дадому хоча”.

Надзея Пятроўна вельмі просіць журналістаў пакуль не тэлефанаваць ні самой Тані, ні сям’і Запатаў. Яна паабяцала сама распавесьці пра рашэньне ўнучкі, як толькі тая вызначыцца канчаткова.
XS
SM
MD
LG