Лінкі ўнівэрсальнага доступу

Агляд тэлефанаваньняў на “Свабоду” за 29 кастрычніка, сераду.


30 кастрычніка спаўняецца 20 гадоў першай масавай акцыі на Дзень памяці продкаў “Дзяды”. Сёлетняе шэсьце на “Дзяды” партыя БНФ распачынае зь месца гістарычнай падзеі — Усходніх могілак Менску. Кансэрватыўна-Хрысьціянская партыя БНФ — з традыцыйнага месца збору, ад менскага гадзіньнікавага заводу. Камэнтары слухачоў:

Ніна Ярмалінская, Салігорск: “Дарагія сябры КХП БНФ! Калі ласка, прыйдзіце 2 лістапада а 12 гадзіне да Ўсходніх могілак, каб нам усім разам прайсьці ў Курапаты і нам усім разам ушанаваць памяць нашых дзядоў”.

Тацьцяна Барэй, Асіповічы: “На Дзяды я заўсёды хаджу на могілкі да бацькоў, а таксама па магчымасьці ў Курапаты. Абрад восеньскага памінаньня продкаў прыйшоў да мяне з Адраджэньнем. Ва ўрочышча я ўпершыню патрапіла, калі за яго захаваньне змагалася моладзь. З таго часу стараюся прайсьці ў калёне ад гадзіньнікавага заводу. Хай больш людзей ведае і памятае пра ахвяраў НКУС, каб тое не паўтарылася. Вельмі добра, што ходзяць на Ўсходнія могілкі ўскладаць кветкі на магілы пісьменьнікаў. Адно другому не супярэчыць, а толькі дапаўняе. Усё роўна ў Курапаты ўсе прыйдуць разам. Жыве Беларусь!”

Працягваем праграму пытаньнем, якое праз СМС даслаў Робэрт Кузьняцоў: “Шаноўная Свабода! Па вашым радыё пачуў, што Беларусь у сусьветным рэйтынгу па ўзроўні свабоды СМІ заняла 154-е месца. Цікава было б даведацца, якія краіны займаюць 1, 2 i 3 месцы. А таксама якія месцы займаюць такія краіны, як Латвія, Расея, Украіна, ЗША і Грузія”.

На пытаньне адказвае сябра грамадзкай арганізацыі “Беларуская асацыяцыя журналістаў” Андрэй Бастунец:

“Паводле індэксу, складзенага міжнароднай арганізацыяй “Рэпартэры бязь межаў”, першае і другое месцы ў сьвеце паводле свабоды слова займаюць Ісьляндыя і Люксэмбург. Трэцяе месца трымае Нарвэгія. Латвія таксама займае вельмі добрае месца — яна і некалькі іншых краін падзяляюць месцы зь сёмага па трынаццатае. Украіна знаходзіцца на 87 месцы, што таксама неблагі паказьнік. Расея — на 141 месцы, Грузія — на 120 месцы. ЗША ў гэтым рэйтынгу маюць 36 месца”.

Далей выказваньні ў працяг тэмы:

Спадар: “Я хачу выказаць падзяку вашаму радыё, што кожны можа выказаць свае думкі, меркаваньні, і самае галоўнае — абсалютна бясплатна. Я вось не магу спакойна ўспрымаць, як амаль у кожнай дзяржаўнай перадачы на тэлебачаньні, радыё кожныя паўгадзіны лямант стаіць: “Мы хочам ведаць вашае меркаваньне, удзельнічайце ў нашых перадачах, выказвайце свае думкі!” Але ж усё гэта толькі за грошы. Нават цану не называюць, а адсылаюць на сайт тэлерадыёкампаніі. А паслуга аказваецца платная. Дрэнныя справы, значыцца, у дзяржаве, калі нават дзяржаўная радыёкампанія спрабуе такім чынам зарабіць нейкую капейчыну”.

Спадар: “У “Камсамолцы” пазначаны частоты, напрыклад, 6105 — як гэта зразумець на звычайным радыёпрыймачы?”

На пытаньне адказвае супрацоўнік Радыё Свабода Сяргей Шупа:

“Рэч у тым, што ёсьць дзьве традыцыі пазначэньня месца ў эфіры: частата і даўжыня хвалі. Яны суадносяцца праз хуткасьць сьвятла. Каб, ведаючы частату, вылічыць даўжыню хвалі, трэба 300 000 — гэта хуткасьць сьвятла — падзяліць на частату. І ў выніку мы атрымаем даўжыню хвалі ў мэтрах. І тады трэба глядзець на прыймачы, якая разьметка шкалы: звычайна кароткія хвалі дзеляцца на некалькі — пяць, шэсьць — паддыяпазонаў. Скажам, 25 мэтраў, 31 мэтар, 41 мэтар, 49 мэтраў. Альбо разьметка будзе ў гэтых мэтрах, альбо ў кілягерцах. І ў залежнасьці ад гэтага глядзіце, на што вам арыентавацца: ці на частату, ці на даўжыню хвалі. Нагадваю, што пераход з частаты на даўжыню хвалі атрымліваецца, калі падзяліць 300 000 на тое, што вы маеце”.

Працягваем праграму тэлефанаваньнем на тэму выбараў:

Спадар: “Не сакрэт, што каля трэці дэпутатаў так званай Палаты прадстаўнікоў засталіся ў сваіх крэслах яшчэ на адзін тэрмін, нягледзячы на тое, што ў складзе мінулай “палаткі” яны дружна галасавалі за скасаваньне льготаў і іншыя непапулярныя ўказы правадыра. Калі б у нас былі сапраўдныя выбары, то за такое ніхто б ня стаў дэпутатам паўторна”.

Шаноўныя слухачы! Нагадаем: тэлефон “Свабоды” ў Менску — 266-39-52, працуе 24 гадзіны на суткі. Нумар мабільнай сувязі для СМС-паведамленьняў: + 375.293.912.224. Тэлефануйце і пішыце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё Свабода.

XS
SM
MD
LG