Лінкі ўнівэрсальнага доступу

logo-print

“Даляраў няма, але абяцаюць завезьці”


Ці можна свабодна набыць амэрыканскую валюту ў беларускіх рэгіёнах?


Перадусім “Свабоду” цікавілі раёны беларускага памежжа. Бо, да прыкладу, польскія інфармацыйныя агенцтвы сёньня паведамілі, што курс даляра адносна злотага падвысіўся ўжо на 30 працэнтаў. За адзін даляр у Польшчы бяруць больш як тры злотыя.

У Бабруйску ўзрос попыт насельніцтва на замежную валюту

У Магілеве і Бабруйску насельніцтва скупляе замежную валюту. З чым гэта зьвязана, у банках ня кажуць, толькі запэўніваюць, што здольныя задаволіць гэты попыт.

У валютным аддзеле магілёўскай управы “Беларусбанку” карэспандэнт пачуў:

“У Магілёве людзі скупляюць усё. І эўра, і расейскія рублі, і даляры. У нас ніколі не было нястачы ў попыце. Ад лета попыт перавышае прапанову”.

У адным з бабруйскіх аддзяленьняў “Беларусбанку” таксама зазначылі, што попыт на замежную валюту значна ўзрос. Паводле супрацоўнікаў гэтага аддзяленьня, “насельніцтва само сябе накручвае, а пасьля скупляе валюту”.

У Мсьціслаў тэрмінова зьяжджаюцца банкіры

Плянуецца, што заўтра ў Мсьціславе адбудзецца пашыранае паседжаньне Нацыянальнага банку. Напярэдадні інтэрвію “Свабодзе” даў начальнік упраўленьня інфармацыі Анатоль Драздоў.

“Банк — гэта камэрцыйная ўстанова. І калі будзе ўзрастаць попыт на валюту, то будзе падвышацца курс. Улічвайце, што расьце курс даляра і на валютна-фондавай біржы. У адпаведнасьці з гэтымі таргамі павялічваецца і курс Нацыянальнага банку”.

Як цяпер трэба паводзіцца жыхарам Беларусі, каб ня страціць свае зьберажэньні ў валюце?

“Калі надыходзіць пэрыяд няпэўнасьці, то самая лепшая пазыцыя — сесьці, скласьці рукі на жываце і спакойна глядзець тэлевізар...”

Наваградак: ужо два дні нельга купіць даляры

Кіраўніца валютнага аддзелу “Беларусбанку” ў Наваградку Тацяна Базарэвіч сёньня заявіла:

“Бяруць людзі валюту. Да прыкладу, даляраў у нас ужо няма два дні, але абяцаюць завезьці заўтра і пасьлязаўтра. Звычайна ў канцы году такія сытуацыі. Летась таксама было такое, толькі раскуплялі эўра. А сёлета эўра ёсьць у свабодным продажы, а даляры разьмялі”.

Кіраўнік аддзяленьня “Беларусбанку” ў Слонімскім раёне Аляксандар Лагуцік:

“Праблемаў няма. Адчуваецца павышаны попыт, нейкая хваля, але валюта ёсьць у свабодным продажы і праблемаў няма”.

Намесьніца кіраўніка аддзяленьня “Беларусбанку” ў Ваўкавыску Сьвятлана Хвастова:

“У прынцыпе, праблемы якія: людзі апошнім часам разьбіраюць валюту, але яна ўсё роўна ёсьць у свабодным продажы. Эўра свабодна можна купіць, даляры — таксама. Здараюцца пэрыяды, калі ў запасе няма, але мы хутка закупляем, завозім, і ўсё. Але такога, каб не было валюты пастаянна, такога ў нас няма”.

“Для жабракоў пажар ня страшны”

Фінансавы крызіс, праўдападобна, дабраўся й да Гомеля. У абменных пунктах валюты сёньня практычна немагчыма набыць даляры.

Гаворыць гараджанка, спадарыня Валянціна:

“Даляраў у продажы няма. Во хадзілі ў “Белаграпрамбанк” — сказалі, няма ў наяўнасьці”.

Ня мела даляраў на продаж аддзяленьне № 300 “Беларусбанку”, іншыя ягоныя гарадзкія структуры.

“Прадаць можам толькі тое, што людзі здалі нам на абмен, — кажа касір гомельскага філіі № 6 банку “ВТБ”. — Нічога іншага прапанаваць ня можам”.

У абменным пункце валюты Белпрамбудбанку на вуліцы Савецкай утварылася чарга. Даляраў на продаж тут таксама ня мелі. Некаторыя гараджане, аднак, здавалі эўра, бо курс гэтай валюты падае:

“Для жабракоў пажар ня страшны, — кажа адна зь пэнсіянэрак. — Во завялося ў мяне 20 эўра, год зьберагала. А цяпер — напляваць. На 30 рублёў даражэй. Выжываем, выжываем, выжываем”.


XS
SM
MD
LG