Лінкі ўнівэрсальнага доступу

logo-print

Парыскія цікавосткі


Аўтар за сталом, за якім Напалеон Банапарт падпісаў адрачэньне ад улады імпэратара Францыі

Аўтар за сталом, за якім Напалеон Банапарт падпісаў адрачэньне ад улады імпэратара Францыі

Завяршэньне фотаблогу з Парыжу.


У Парыжы так шмат усяго цікавага, і кожны дзень час ўдавалася заўважаць нешта новае, незвычайнае. Тым болей, што дзякуючы МЗС Францыі, якое арганізавала паездку для беларускіх журналістаў, удалося патрапіць у месцы, дзе звычайныя турысты рэдка бываюць. Але ўсё не апішаш, таму я на фінал я падрыхтаваў выбранае з таго, што мяне ўразіла.

Пачну з Нацыянальнай асамблеі. Парлямэнт Францыі знаходзіцца ў старажытным палацы на беразе Сены. Калі мы туды трапілі, у даволі цеснай сэсійнай зале было шумна, дэпутаты нешта выкрыквалі. Яны заслухоўвалі адказы сябраў ураду і часта былі незадаволеныя імі. Такую атмасфэру ў беларускім парлямэнце апошні раз я назіраў хіба што у 1996 годзе… У францускім парлямэнце ў дзень нашай экскурсіі найбольшыя воплескі дэпутатаў сабрала заява аднаго зь іх калег аб тым, што найбольшы заробак з дзяржслужачых атрымліваюць 90 урадоўцаў з атачэньня прэзыдэнта Нікаля Сарказі, і што трэба ўвогуле ўрэзаць фінансаваньне Элізейскага палацу.

Дэбаты ў францускім парлямэнце

Ад часоў Вялікай францускай рэвалюцыі ў Нацыянальнай асамблеі праходзіць штодзённая цырымонія вітаньня сьпікера парлямэнту ганаровай вартай узброеных сіл. Вельмі ўрачыста. Ніжэй можна паглядзець фота і відэазапіс. Пасьля цырымоніі прадстаўнікі парлямэнту суправаджаюць гэтых вайскоўцаў у казармы. Раней баяліся перавароту. Цяпер — традыцыя.

Цырымонія вітаньня старшыні парлямэнту



У памяшканьнях парлямэнту шмат раскошы, якая засталася ад каралеўскіх часоў, і была бездакорна рэстаўраваная. У цырыманіяльным кабінэце старшыні асамблеі засталося бюро, на якім Напалеон Банапарт першы раз падпісаў адрачэньне ад улады.

У Францыі даўно няма імпэратара. Але кіраўнік краіны ўплывовы і цяпер. У студзені прэзыдэнт Сарказі заявіў, што на дзяржаўных тэлеканалах ня будзе рэклямы. І вось ужо ў наступным годзе пачнецца выкананьне гэтай задачы, увасобленай у законе: паказ рэклямы па 5 дзяржаўных каналах будзе зьменшаны, яе ня будзе з 20.00 да 6.00 гадзін, а з 2011 году — спыніцца зусім. Будзе скарочана 350 працоўных месцаў.

Старшыня міжнароднага дэпартамэнту France Televisions Жан-Луп Калязэль (Jean-Loup Calazel) расказвае пра тэлебачаньне без рэклямы

Парыж па-свойму вырашае транспартную праблему: усё больш жыхароў перасела з машын на матацыклы, а мэрыя прапанавала боль рашучы крок: езьдзіць на муніцыпальных веласіпэдах: ва ўсіх раёнах горада ёсьць стаянкі аднолькавых веласіпэдаў сыстэмы Velib. Іх можна ўзяць бясплатна на паўгадзіны, далейшая паездка каштуе эўра-два. Веласіпэд можна пасьля паездкі паставіць на любую з адмысловых стаянак у горадзе.

Паслуга карыстаецца папулярнасьцю.

Ровары сыстэмы Velib

Турыстам жа прапануюць і паслугі веларыкшаў. Але ахвотных імі скарыстацца малавата. Гадзіна паездкі на аднаго каштуе 25 эўра, на дваіх — 30.

Парыскі веларыкша

Зарабіць на турыстах імкнуцца многія. У тым ліку і спэцыялісты рэдкіх цяпер прафэсій.

Парыскі шарманшчык

Жанглёр на Манмартры

Жабраваць у Парыжы не забараняецца. Бедныя і бяздомныя маюць магчымасьці знайсьці ложак у сацыяльных прытулках, але часам можна пабачыць, як яны ўкладваюцца на начлег у нейкіх зацішных закутках дамоў ці нават на тратурарах.

Жабрак на Елісейскіх палях

Пляц Пігаль і бульвар на вуліцы Клішы па начах запоўненыя аматарамі “клубнічкі”. Чэргі ў знакамітае кабарэ Мулен Руж стаяць і днём.

Мулен Руж

А вось чэргаў у расейскія гастраномы я не бачыў. Такіх у Парыжы пяць. Там прадаецца пераважна расейская і ўкраінская гарэлка ды закуска зь ліку настальгічных для расейскіх ды экс-савецкіх эмігрантаў прадуктаў. Зь беларускай прадукцыі тут часам бываюць цукеркі.

Расейскі гастраном на бульвары Манпарнас

На гэтым я завяршаю камандзіроўку і свой “Парыскі блог”. Шчыра дзякую Дырэкцыі камунікацыі і інфармацыі Міністэрства замежных справаў Францыі, амбасадзе Францыі ў Менску за спрыяньне і клопат у арганізацыі паездкі і сустрэч групы беларускіх журналістаў.

Група беларускіх журналістаў у Парыжы

Паказаць камэнтары

XS
SM
MD
LG