Лінкі ўнівэрсальнага доступу

919 твораў пра Галакост


У менскім палацы моладзі ўзнагародзілі пераможцаў конкурсу “Галакост. Гісторыя. Урокі талерантнасьці”. Большасьць удзельнікаў конкурсу — не габрэі.


У менскім палацы моладзі адбылося ўзнагароджаньне пераможцаў конкурсу “Галакост. Гісторыя. Урокі талерантнасьці”. На конкурс з усёй краіны паступілі 919 твораў. Большасьць удзельнікаў конкурсу — не габрэі.

Конкурс быў прысьвечаны 65-годзьдзю зьнішчэньня менскага гета. Яго праводзілі Саюз беларускіх габрэйскіх грамадзкіх аб’яднаньняў, рэспубліканскі фонд “Галакост” і музэй гісторыі і культуры габрэяў Беларусі.

Творы на конкурс прыйшлі са 102 раёнаў краіны. Удзельнікі: школьнікі, студэнты, выкладчыкі ВНУ і школаў — даслалі краязнаўчыя работы, мэтадычныя матэрыялы, навуковыя дасьледаваньні, фільмы, прэзэнтацыі, малюнкі і апавяданьні.

Каля актавай залі дэманстраваліся малюнкі, якія сталі пераможцамі ў конкурсе. Сярод работ былі й намаляваныя 8-гадовымі школьнікамі.

Урачыстае паседжаньне пачалося з малітвы. Пасьля выступілі прадстаўнікі габрэйскіх арганізацый і былыя вязьні гета.

Леанід Левін
Старшыня Саюзу беларускіх габрэйскіх грамадзкіх аб’яднаньняў Леанід Левін лічыць, што конкурс даў адказ на асноўнае пытаньне: “Ці хвалюе сучасную моладзь тэма вайны, тэма Галакосту?”.

“Сапраўды было цікава паглядзець, як думае моладзь. Вы ведаеце, мы вельмі задаволеныя, бо, калі б вы хоць адзін-два найлепшыя творы ўзялі ў рукі, то такія думкі, такі погляд на ўсё гэта!.. Вось хоць адзін каласок зьявіўся сёньня, і гэта ўжо добра. Каласок дасьць зярняткі, а зярняткі дадуць нам іншыя каласкі”.



Дырэктарка музэю габрэйскай культуры Іна Герасімава выступіла перад прысутнымі.

“Журы конкурсу, у якое ўвайшлі 17 чалавек, склалася з пэдагогаў, журналістаў, карэспандэнтаў радыё і тэлебачаньня. Я хачу сказаць, што ацэньваў гэтыя работы не адзін чалавек. Акрамя таго, удзельнічалі дзеля таго, каб вызначыць вашы месцы, людзі, якія абсалютна ня маюць дачыненьня да пэдагогікі і гісторыі”.

Дыплямантам конкурсу дарылі кнігі і кветкі. Далёка ня ўсе прысутнічалі на цырымоніі ўзнагароджаньня, але арганізатары запэўнілі, што кожны ўдзельнік атрымае свой падарунак.

20 і 21 кастрычніка на мэмарыяле «Яма» адбудуцца ўрачыстыя мерапрыемствы ушанаваньня памяці ахвяраў менскага гета. Конкурс стаў часткай падрыхтоўкі да гэтай даты.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG