Лінкі ўнівэрсальнага доступу

Эўрадэпутаты выбіралі паміж дрэнным і вельмі дрэнным


Як можна ацаніць праект рэзалюцыі? Пра што кажа хада дыскусіі ў сьценах Эўрапарлямэнту? На гэтыя пытаньні адказвае палітоляг Андрэй Фёдараў


Цыганкоў: “У праекце рэзалюцыі прапануецца прыпыніць візавыя санкцыі Эўразьвязу супраць некаторых беларускіх чыноўнікаў на паўгоду — з тым, каб за гэты час быў перагледжаны нядаўні дыскрымінацыйны закон аб СМІ ў Рэспубліцы Беларусь. Прапанова прыпыніць візавыя санкцыі не закранае асоб, якія арганізоўвалі парлямэнцкія выбары. У праекце рэзалюцыі Эўрапарлямэнту гэтыя выбары прапанавана не прызнаваць свабоднымі і дэмакратычнымі. Як вы ацэніце такі праект рэзалюцыі, наколькі ён адлюстроўвае новае стаўленьне Эўропы да сытуацыі ў Беларусі?”

Андрэй Фёдараў
Фёдараў: “Наколькі мне падаецца, даволі дакладна адлюстроўвае. Гаворка пра часовае прыпыненьне візавых санкцый гучала ўжо некалькі дзён таму, і тое, што гэтая прапанова ўвайшла ў праект рэзалюцыі і, найхутчэй, будзе прынятая — сьведчыць, што Брусэль, нягледзячы на хібы выбарчай кампаніі, па-ранейшаму зацікаўлены ў дыялёгу зь Беларусьсю і дае гэта яшчэ раз зразумець. Тое, што прапануецца не прызнаваць дэмакратычнымі парлямэнцкія выбары, падаецца лягічным — сапраўды, парушэньняў было занадта шмат. Адпаведна, лічу нармальным падыходам тое, што санкцыі будуць зьнятыя з тых асобаў, якія ня ўдзельнічалі ў арганізацыі выбараў.

Можна нагадаць, што гэта ўжо прыблізна 20-ая рэзалюцыя ў справах Беларусі.
Эўропа цяпер апынулася ў такім стане, калі вельмі рэзка абвастрылася супрацьстаяньне з Расеяй. Эўропа бачыць расейскія памкненьні вярнуць пад свой кантроль постсавецкую прастору і спрабуе ня даць Маскве магчымасьці гэта зрабіць, і ў тым ліку ў дачыненьні да Беларусі. Фактычна ёсьць выбар паміж дрэнным і вельмі дрэнным — фактычнай стратай незалежнасьці Беларусі й праблемамі, якія застаюцца з дэмакратыяй у краіне”.

Цыганкоў: “На сайце Свабоды вёўся онлайн-рэпартаж пра дыскусію ў беларускім пытаньні. Як вы ацэніце тыя выказваньні й прапановы, што гучалі падчас абмеркаваньня? Дэпутаты там вельмі розныя — і правыя, і левыя. Ці дэманстравалі яны аднолькавасьць у стратэгічных падыходах да Беларусі?”

Фёдараў: “Я не заўважыў там значных разыходжаньняў паміж пазыцыямі розных фракцыяў — хутчэй наадварот. Большая частка прапановаў былі вельмі слушныя — напрыклад, пра зьніжэньне кошту шэнгенскіх візаў. Магчыма, яны і ўвойдуць у рэзалюцыю, але ня трэба забываць, што гэтыя дакумэнты маюць рэкамэндацыйны характар. Эўракамісія ды іншыя выканаўчыя структуры Эўразьвязу не абавязаныя іх выконваць.

Можна нагадаць, што гэта ўжо прыблізна 20-ая рэзалюцыя ў справах Беларусі. Нельга казаць, што яны нічога не зрабілі — калі б іх не было, сытуацыя магла б пагаршацца. Але сьцьвярджаць, што яны неяк паспрыялі паляпшэньню сытуацыі ў Беларусі — таксама не даводзіцца”.
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода».  На беларускай Свабодзе ад 1994 году. Карэспандэнт расейскай Свабоды ў Беларусі.
     

XS
SM
MD
LG