Лінкі ўнівэрсальнага доступу

logo-print

Казулін: "Лукашэнка – гэта выклік эўрапейскай цывілізацыі"


Вольга, Аляксандар і Юлія Казуліны

Вольга, Аляксандар і Юлія Казуліны

Госьці "Начной Свабоды" – былы кандыдат на прэзыдэнта і палітвязень Аляксандар Казулін і ягоная дачка, экс-кандыдатка ў дэпутаты Вольга Казуліна (эфір 30 верасьня).

Соўсь: "Я ведаю, што сёньня вы былі ў маці Ірыны Казулінай: у яе сёньня 70-гадовы юбілей. Якія словы памяці Ірыны Казулінай сёньня гучалі ў доме яе маці? Спадар Аляксандар..."

Аляксандар Казулін: "Ну вы ведаеце, я думаю, што маці маёй дарагой Ірышкі, відаць, было заўсёды вельмі цяжка: страціць родную дачку, страціць роднага мужа... І, канечне, у першую чаргу словы самыя шчырыя былі сказаныя ёй. Натуральна, і сьветлая памяць маёй любімай жонкі, майго цесьця, яны таксама прысутнічалі там.

Гэта ведаеце, як бы вось сьвята са сьлязьмі на вачох. У нашым жыцьці ўсё бывае. І радасьць, і гора. І вось яно, калі зьяднанае, і паплакалі, і, можа, недзе пасьмяяліся трошкі. Бо жыцьцё ідзе далей.

Самае галоўнае, што ў маёй мамы, а я сваю цешчу называю мамай, узьняўся такі ўнутраны настрой, калі яна разумее, што яна не адна, што зь ёй яе дзеці, што зь ёй яе ўнукі. І што жыцьцё не спыняецца. Гэта было вельмі важна".

Соўсь: "Вольга, маці, напэўна б, ганарылася вамі, але і хвалявалася, што вы пайшлі ў палітыку..."

Вольга Казуліна: "Так, мама заўсёды перажывала, што вось неяк яна сама была ўцягнутая ў палітыку, але ня варта забывацца, што жыцьцё нас само прыводзіць да канкрэтных падзей і мы самі робім свой выбар. Калі мы пайшлі ў палітыку з прычыны любых абставінаў, значыць, так павінна быць".



"Трэба аддзяляць вызваленьне палітвязьняў ад выбараў"

Соўсь: "У бліжэйшы час ЗША могуць адмяніць санкцыі ў дачыненьні некаторых беларускіх прадпрыемстваў, пра гэта заявіў Часовы Павераны ў справах ЗША ў Беларусі Джонатан Мур. У сувязі з вызваленьнем палітвязьняў мы пачалі працэс зьмякчэньня санкцый, у дадзены момант я не прадбачу ніякіх плянаў увядзеньня новых абмежаваньняў. Наадварот, у Вашынгтоне ўвесь час вядзецца дыскусія пра далейшае прыпыненьне санкцый пасьля вызваленьня палітвязьняў у жніўні”. Спадар Аляксандар, як бы вы пракамэнтавалі гэтую заяву, улічваючы, што ніводзін прадстаўнік апазыцыі ня трапіў у парлямэнт?"

Казулін: "Ведаеце, трэба аддзяляць вызваленьне палітзьняволеных ад правядзеньня парлямэнцкіх выбараў. Бо гэта ўсё ж розныя рэчы. Санкцыі былі ўведзеныя ЗША ў зьвязку з тым, бо не былі вызваленыя палітвязьні. І яны былі ўведзеныя не супраць беларускага народу, а супраць самадурства палітыкі, якую праводзіў беларускі палітычны рэжым.

І гэтыя санкцыі якраз і сыгралі галоўную ролю ў тым, што палітзьняволеныя і Андрэй Кім, і Сяргей Парсюкевіч, і я - выйшлі на свабоду. Таму калі ліквідуецца прычына, зь якой уводзяцца санкцыі, то павінен быць зроблены крок у адказ з боку ЗША. Гэта - лягічна, гэта - правільна.

Што тычыцца правядзеньня парлямэнцкіх выбараў, то пытаньне тычылася наступнага моманту. Калі выбары праходзяць дэмакратычна, як заявіў наш гегемон, што яны пройдуць больш дэмакратычна, больш сумленна, чым ва ўсіх краінах Эўропы і сьвету, ён гэта даказаў, што ўмее гуляць словамі, але ня ўмее рэальна выконваць абавазяньні і сваіх словаў.

І тое, што адбылося на парлямэнцкіх выбарах, гэта, фактычна, зьяўляецца пляўком у бок у першую чаргу эўрапейцаў. Я шмат разоў казаў пра тое, што Аляксандар Рыгоравіч Лукашэнка - гэта нашмат больш сур'ёзна, чым некаторыя мяркуюць. Гэта выклік усёй эўрапейскай цывілізацыі. І ставіцца тут трэба ня толькі як да асобы, пэрсоны, а як да сур'ёзнага выкліка.

Бо з аднаго боку ідзе хамства і грубы гвалт, а з іншага ёсьць культурнае і цывілізаванае стаўленьне да самога працэсу. І да выкананьня ўзятых забавязаньняў. Таму гэтыя надзеі, якія мелі эўрапейцы, сёньня проста разбураныя. Пытаньне стаіць у тым, што будзе далей. Але гэта ніяк ня можа быць зьвязанае з эканамічнымі санкцыямі, якія ўвялі ЗША".

"Я сутыкнулася зь дзікай несправядлівасьцю"


Соўсь: "Тое, што Аляксандар Казулін і яго дачка Вольга будуць гасьцямі "Начной Свабоды", мы праанансавалі на нашым сайце svaboda.org і ў эфіры і прапанавалі нашым слухачам і наведнікам сайту задаць Вам абодвум пытаньні. Першае пытаньне наведніцы сайту Алены з Менску да Вольгі Казулінай:

“Вольга, што дала Вам выбарчая кампаніі, а што забрала?”

Казуліна: "Дала яна нам вельмі шмат. Асабіста мне. Я пакантактавала з народам, я ўбачыла, якія ў іх праблемы. Я сутыкнулася зь дзікай несправядлівасьцю і парушэньнем правоў асабліва ў выбарчым заканадаўстве.

А страціла я нашмат менш, чым здабыла. Страціла я... Ува мне тлела надзея, што ўсё ж Лукашэнка стаў на шлях дэмакратызацыі. І калі паглядзець па выніках выбараў, мы цудоўна ўбачылі, што ўсе тры месяцы, якія ён гаварыў, што Беларусь стала на шлях дэмакратызацыі, што ў Беларусі будуць празрыстыя выбары, гэта ўсё фарс, хлусьня. І вынікі выбараў гэта паказалі".

"Турма – гэта плата за выратаваныя жыцьці"

Соўсь: "Пытаньне Аляксандру Казуліну ад яшчэ аднаго наведніка нашага сайту:

"Спадар Аляксандар Казулін, калі было б магчыма вярнуцца трохі ў мінулае і зьмяніць гісторыю, ці павялі б вы людзей усё роўна да Акрэсьціна? І ці магчыма было б неяк па-іншаму, у тым ліку ня так радыкальна, дзейнічаць у тую вясну і падчас выбарчай кампаніі? Што Вы адчувалі, калі атрымалі вырак? Дзякуй".

Казулін: "Вы ведаеце, час гісторыі не павернеш. Важна толькі якія высновы робім і ўрокі атрымліваем. Калі ўзяць сытуацыю падзеяў сакавіка 2006 году, то я ня быў вельмі радыкальным. Я стараўся дзейнічаць у рамках закону. Я дзейнічаў у рамках закону. І я хацеў паказаць усяму сьвету, што ў нашай краіне законаў не існуе.

Калі кандыдат у прэзыдэнты Рэспублікі Беларусь, які паводле Канстытуцыі мае вялізарныя магчымасьці, ня можа дамагчыся выкананьня сваіх правоў, дык што казаць аб простым грамадзяніну.

Думаю, што на маім прыкладзе ў гэтым змаглі пераканацца ня толькі грамадзяне Беларусі, але і грамадзяне ўсяго сьвету.

Што тычыцца Акрэсьціна, то я думаю, што ў першую чаргу трэба разумець, што палітык ці лідэр павінен мець адказнасьць. Адказнасьць за тых, хто выходзіць на плошчу. Бо яны выходзяць і ідуць на заклікі тых жа палітыкаў. А вось што з імі пасьля бывае... І хто за гэта адказвае? На гэтае пытаньне трэба адказаць. Бо на той момант больш за тысячу юнакоў і дзяўчат былі ў турме на Акрэсьціна. І бацькі на працягу некалькіх дзён ня ведалі, дзе яны знаходзяцца. Дзеці зьніклі бязь вестак. Мала хто ведае, як з імі там абыходзіліся, мала хто ведае, як з імі абыходзіліся ў аўтазаках, нахабна, цынічна там зьбівалі.

А тое, што ўлады зладзілі крывавую бойню, то я думаю, што выратаваў не адзін дзясятак маладых жыцьцяў. Я думаю, што турма - гэта плата за выратаваныя жыцьці
Канечне, не прыйсьці туды на Акрэсьціна, не штурмаваць, як гэта падаецца нашай афіцыйнай прапагандай, а выказаць маральную салідарнасьць з імі. Каб яны адчулі, што яны ня кінутыя, што іх вычын, а я сур'ёзна кажу - грамадзянскі вычын маладых людзей - не забыты і ацэнены. І гэта было самым галоўным. А тое, што ўлады зладзілі крывавую бойню, то я думаю, што выратаваў не адзін дзясятак маладых жыцьцяў. Я думаю, што турма - гэта плата за выратаваныя жыцьці".

"Даць людзям свабоду слова"

Соўсь
: "Зараз я зьвяртаюся да Вольгі Казулінай. Вось вы абскарджваеце абвешчаныя ЦВК вынікі выбараў, а напярэдадні галасаваньня казалі, што ў выпадку абраньня бацька будзе вашым памочнікам. Што найперш бы вы хацелі зрабіць, калі б трапілі ў парлямэнт?"

Казуліна: "Найперш бы зьмянілі крымінальны кодэкс, прыбралі б адтуль артыкулы, на аснове якіх саджаюць у турму людзей, якія выступаюць супраць пазыцыі Аляксандра Рыгоравіча Лукашэнкі. Даць людзям свабоду слова. Другі закон - "Аб сродках масавай інфармацыі". У краіне павінна быць вялікая колькасьць СМІ, ня толькі дзяржаўных. Але і незалежных і прыватных. Гэта тычыцца як тэлебачаньня, так і газэтных выданьняў. Гэта дасьць магчымасьць нашаму грамадзтву мяняць свой мэнталітэт".

Соўсь: "А зараз пытаньне слухача, якое ён пакінуў, пазваніўшы на аўтаатдказьнік у Менску, -

"У Эвангельлі ад Іаана Ісус Хрыстос даў вызначэньне, хто такі д'ябал. Ён сказаў сваім вучням: ведаеце, што д'ябал - гэта хлус і бацька хлусьні. Паважаны Аляксандар Уладзіслававіч. Дзясяткі тысяч толькі ў Маладэчне маліліся за вашае здароўе і за тое, каб вы былі на волі. Як вы лічыце, вось гэтае вызначэньне Хрыста, што д'ябал - гэта хлус і бацька хлусьні. Гэтае вызначэньне спрацоўвае ва ўладзе ці улады яно не датычыць.

Казулін: "Я думаю, гэтае пытаньне закранае самае галоўнае. Маральныя, духоўныя каштоўнасьці. Часта мы пра іх забываем. І часта мы не разумеем, што яны нас павінныя па жыцьці весьці. Калі мы гаворым пра хлусьню і цынізм, то сапраўды гэтыя хлусьня і цынізм прасякнулі нашае жыцьцё. І праблема ня ў бацьку, хоць ён і зьяўляецца бацькам хлусьні. Праблема ў самой сыстэме. Гэтая сыстэма як мэтастаза апутвае маладыя душы, сэрцы. Ня трэба тварыць і ствараць, а трэба добра выконваць загады і ўмець падстроіцца пад сыстэму ўлады і пад сыстэму кар'еры. Вось гэта самае горшае.

І я шмат разоў гаварыў, што праблема не ў Лукашэнку, але ў сыстэме, якую ён стварыў. І галоўнае – як пасьля будуць жыць, калі мэтастазамі разьедзенае ўсё грамадзтва?"

"Эўрапейцы хацелі даць магчымасьць для новага разьвіцьця краіны"

Соўсь: "Вось вы як і прагназавалі напярэдадні выбараў, назіральнікі АБЭС заявілі, што выбары не адпавядалі міжнародным стандартам, нягледзячы на некаторыя паляпшэньні. Які ваш прагноз цяпер, як будзе Захад далей будаваць узаемадачыненьні зь беларускімі ўладамі?"

Аляксандар Рыгоравія чарговым разам ня толькі зьдзівіў, але ўразіў Захад
Казулін
: "Я думаю, што Аляксандар Рыгоравія чарговым разам ня толькі зьдзівіў, але ўразіў Захад. Як сказаў кіраўнік ПАРЭ Дэйвіс, "Лукашэнка майстра ўпускаць магчымасьці". Гэта проста фантастыка: мець такія магчымасьці адкрыць дарогу ў Эўропу... З боку эўрапейцаў былі шчырыя памкненьні ладзіць новыя адносіны зь беларускім палітычным рэжымам. Але Лукашэнка сапраўды ніколі ня ўпусьціць магчымасьці ўпусьціць магчымасьць. Я ў душы спадзяваўся, што, магчыма, наш гегемон стаміўся ад пастаянных войнаў, пошуку ворагаў, разумее, што супрацоўніцтва - гэта тое, што патрэбнае нашай дзяржаве.

Але ён даказаў, што ня мае стратэгічнага пляну, а кіруецца сытуацыяй моманту. Тое, што сёньня ўбачылі эўрапейцы, я ўяўляю, наколькі яны ўражаныя пасьля такіх сур'ёзных перамоваў. Таму мне цяжка сказаць, як далей будуць разьвівацца адносіны. Эўрапейцы ж сярод іншага хацелі даць магчымасьць для новага разьвіцьця краіны. І зараз яны ў складанай сытуацыі - як рабіць далей".

Соўсь: "Зараз я хацела б прапанаваць Вам паслухаць ацэнку выбарчай кампаніі лідэра Кансэрватыўна-Хрысьціянскай партыі БНФ Зянона Пазьняка".

Пазьняк: "Мушу сказаць, што калі б людзі і арганізацыі, якія ўдзельнічалі ў ілжывых выбарах і ішлі да канца, каб яны падтрымалі байкот галасаваньня, то ўдар па рэжыму быў бы значна мацнейшы. Рэжым захістаўся, але, як і трэба было чакаць, падстаўная апазыцыя аб'ектыўна падтрымала рэжым, дала яму поле для манэўраў і хлусьні. А цяпер яна крычыць: "Нас кінулі!" Але яны самі сябе кінулі".

Соўсь: "Аляксандар Уладзіслававіч, ці згодныя вы з ацэнкай Зянона Пазьняка?"

Я згодны зь Зянонам Пазьняком, што ў краіне трэба было праводзіць акцыю байкоту
Казулін
: "Я думаю так, канечне можна даваць ацэнкі з-за акіяну. Але пажадана, каб людзі прысутнічалі тут і бачылі, што адбываецца насамрэч. Я згодны зь Зянонам Пазьняком, што ў краіне трэба было праводзіць акцыю байкоту. Але акцыя байкоту не праводзіцца за некалькі дзён ці тыдзень. Акцыя павінна быць падтрыманая ўсёй апазыцыяй. Калі ж сярод дэмсілаў ёсьць супярэчнасьці, сама пазыцыя байкоту не была б магчымай. У тых умовах, што ў нас былі, асабліва пасьля абвяшчэньня, што выбары будуць самымі адкрытымі ў сьвеце, ня ўдзельнічаць у іх - даць дадатковыя казыры ў рукі Лукашэнку.

Тое, што было прынятае кансалідаванае рашэньне пра тое, каб засяродзіць намаганьні на паказальных участках, дзе кандыдаты ад апазыцыі маюць усе шанцы на перамогу, гэта даказала, што ўлады пайшлі на беспрэцэдэнтны фарс".


Аляксандар і Вольга Казуліна адказалі і на іншыя пытньні наведнікаў нашага сайту. Адказы на сайце Свабоды пазьней.

  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

Паказаць камэнтары

XS
SM
MD
LG