Лінкі ўнівэрсальнага доступу

“EUobserver”: большасьць краінаў ЭЗ – за паслабленьне санкцыяў супраць Менску


Экспэрты Эўразьвязу разглядаюць варыянты паслабленьня санкцыяў супраць Менску.

Нягледзячы на недэмакратычнасьць і непразрыстасьць беларускіх парлямэнцкіх выбараў 28 верасьня, у аднаўленьні дыпляматычных сувязяў з рэжымам зацікаўленая большасьць краінаў эўрапейскай супольнасьці. Пра гэта паведамляе брусэльскае інтэрнэт-выданьне “EUobserver”.

На ўчорашняй сустрэчы ў камітэце Эўрапейскага Зьвязу ў пытаньнях палітыкі і бясьпекі эўрапейскія міністры замежных справаў заклікалі COEST (аб’яднаную рабочую групу Эўразьвязу па Ўсходняй Эўропе і Цэнтральнай Азіі) выпрацаваць экспэртную ацэнку сытуацыі. Яна павінна быць сфармуляваная ў найбліжэйшы чацьвер на паседжаньні так званай “працоўнай групы” COEST.

У прыватнасьці, размова ідзе пра спыненьне забароны ЭЗ, уведзенай у 1997 г., на сустрэчы з высокімі беларускімі чыноўнікамі і пра скарачэньне сьпісу асобаў, якім забаронена выдаваць візы на ўезд у Эўразьвяз. У гэтым сьпісе цяпер 41 чалавек.

Экспэрты могуць таксама прапанаваць часовае прыпыненьне ўсёй візавай забароны, каб зрабіць магчымай сустрэчу на самым высокім узроўні – з прэзыдэнтам Лукашэнкам, хаця тэарэтычна такі крок дазволіць трапіць у Эўразьвяз людзям кшталту Віктара Шэймана, якога Рада Эўропы абвінавачвае ў дачыненьні да зьнікненьня ў Беларусі шэрагу палітыкаў і грамадзкіх дзеячоў.

“Ніхто ня хоча пускаць у ЭЗ людзей з крывёй на руках, аднак ніхто ня хоча пакідаць Беларусі ў вакуўме ізаляцыі, – сказаў у размове з карэспандэнтам “EUobserver” адзін эўрапейскі дыплямат. – Мы ведаем, што расейскі прэм’ер Пуцін мае намер наведаць Менск 6 кастрычніка, але ня маем ніякай магчымасьці зрабіць нейкія контрапрапановы”.

На ўчорашняй сустрэчы ў Брусэлі прадстаўнікі 27 краінаў ЭЗ пагадзіліся з вэрдыктам АБСЭ адносна неадпаведнасьці беларускіх парлямэнцкіх выбараў дэмакратычным стандартам. Адначасна было зазначана, што Беларусь зрабіла некаторыя станоўчыя крокі, уключаючы вызваленьне палітвязьняў і неўмяшаньне сілавых структураў у мірныя вулічныя акцыі. Што да пытаньня адносна далейшых кантактаў з рэжымам, то тут кансэнсус ня быў дасягнуты.

“Большасьць краінаў выказалася за паслабленьне санкцыяў або дала зразумець, што ня будзе супраць гэтага”, – цытуе “EUobserver” словы дыплямата.

Паводле гэтай крыніцы, Польшча і Літва настойваюць на прагрэсе ў дачыненьнях дзеля таго, каб Беларусь пасьля каўкаскіх падзеяў цалкам ня трапіла пад уплыў Расеі ў новай сытуацыі халоднай вайны.

Што да Нямеччыны, то яна займае нэўтральныя пазыцыі. Найбольшыя праціўнікі паслабленьня санкцыяў – Данія і Нідэрлянды. Пра канчатковае рашэньне адносна санкцыяў, хутчэй за ўсё, стане вядома падчас сустрэчы эўрапейскіх міністраў замежных справаў 13 кастрычніка, паведамляе “EUobserver”.

Паказаць камэнтары

XS
SM
MD
LG